Mae gweuwyr a chroswyr lleol wedi sôn am eu balchder o helpu i greu arddangosfa anhygoel 80 metr o hyd ar thema’r Ail Ryfel Byd a fydd yn cael ei harddangos yn Wrecsam yr wythnos nesaf (o ddydd Llun, Hydref 5).
Mae The Longest Yarn 2 wedi’i chreu gan wirfoddolwyr o bob cwr o’r byd, ac mae’n dod â phrofiad Prydain o’r rhyfel yn fyw.
O D-Day a Brwydr Prydain i fywyd bob dydd ar y Ffrynt Cartref, mae pob golygfa wedi’i hymchwilio, ei dylunio a’i gwneud â llaw.
Mae’r arddangosfa, sy’n cynnwys 80 o baneli celf wedi’u gwau a’u crosio, ar daith o gwmpas y DU ar hyn o bryd, ac mae disgwyl iddi agor i’r cyhoedd yn Eglwys San Silyn yn Wrecsam ddydd Llun, 5 Hydref.
Mae cysylltiad lleol pwysig â’r arddangosfa, gan fod dwy o’r golygfeydd wedi’u creu gan grwpiau crefft yma yn Wrecsam – gan gynnwys grwpiau yn Hightown, Pentre Broughton a Brynteg, Eglwys yr Holl Saint, Gresffordd, Gwersyllt a Llannerch Banna.
Mae’r golygfeydd yn darlunio awyrenwyr Pwylaidd yn ystod Brwydr Prydain, a’r Cynorthwywyr Cludiant Awyr (Air Transport Auxiliary) a hedfanodd awyrennau rhwng ffatrïoedd a sgwadronau rheng flaen.
Roedd Mai Rees Moulton yn un o’r gweuwyr a chroswyr lleol a gymerodd ran yn y prosiect, a chwaraeodd ran hanfodol wrth helpu i gydlynu gwaith grwpiau lleol.
Dywedodd Mai: “Mae’r paneli yn seiliedig ar ffotograffau go iawn o’r Ail Ryfel Byd, ac fe wnaethon ni geisio ail-greu’r golygfeydd mor gywir â phosibl.
“Byddai pob grŵp yn gweithio ar wau neu grosio ffigurau unigol, awyrennau a nodweddion eraill yn y ffotograffau, a oedd wedyn yn cael eu hanfon ata i er mwyn eu tynnu at ei gilydd i greu’r paneli terfynol.
“Mae hyd yn oed ci bach yn eistedd ar adain awyren yn un o’r golygfeydd – rhywbeth wedi’i gopïo’n syth o un o’r ffotograffau.
“Rydw i’n gobeithio y bydd cymaint o bobl â phosibl yn dod i weld yr arddangosfa tra ei bod yn Eglwys San Silyn. Mae wedi bod yn brosiect gwych i fod yn rhan ohono, a rhyngom ni i gyd, mae’n rhaid ein bod ni wedi rhoi cannoedd o oriau…a phwythau!”
Mae Ann De Max yn wirfoddolwr lleol arall a weithiodd ar y prosiect, ynghyd â chydweithwyr yng ngrŵp gwau a chrosio Broughton a Brynteg.
Dywedodd Ann: “Roedd hi’n eithaf anodd, ond roedd hi’n hwyl ac yn hyfryd cyfrannu at y prosiect ar ran Wrecsam.
“Fe wnes i grosio un o’r awyrenwyr ac rydw i’n credu mai’r het oedd y rhan anoddaf! Roedd yna lawer o fanylion bach, felly roedd hi’n her, ond roedd hi’n bleserus iawn.
“Mae ein grŵp yn cyfarfod unwaith yr wythnos ac mae sgwrsio a gweld pawb yr un mor bwysig â’r crefftau, felly roedd yn hyfryd gweithio ar rywbeth gyda’n gilydd.
“Mae’n braf meddwl y bydd yr arddangosfa yn mynd ymlaen i ymweld â rhannau eraill o’r wlad, ac y bydd Wrecsam yn cael ei chynrychioli gyda’r ddau banel hyn. Roedd yn braf iawn bod yn rhan ohono ac rydw i’n gobeithio y bydd pobl yn galw heibio i Eglwys San Silyn i edrych arno.”
Darllenwch fwy am The Longest Yarn 2…
The Longest Yarn 2 – Britain at War
Eglwys San Silyn, Wrecsam
5 Hydref – 29 Hydref
Gweler gwefan Eglwys San Silyn ar gyfer oriau agor.
Mae mynediad i’r arddangosfa am ddim, ond croesewir rhodd o £5 y pen, sy’n cefnogi The Longest Yarn ac elusennau cyn-filwyr.
