Bob blwyddyn mae’r genedl gyfan yn dod at ei gilydd i gofio’r bobl ddewr a roddodd eu bywydau mewn nifer o ryfeloedd er mwyn i’n cenedlaethau ni a rhai’r dyfodol all mwynhau’r rhyddid sydd mor bwysig i ni heddiw.
Ac mae Wrecsam yn cofio!
Mae’r ardal yn falch iawn o’i threftadaeth filwrol ac yn gwerthfawrogi’r aberth eithaf y mae pobl o Wrecsam wedi’i wneud ac yn parhau i’w wneud i gadw ein gwlad yn ddiogel.
Bob mis Hydref, mae’r Lleng Brydeinig Frenhinol yn lansio Apêl y Pabi i godi arian i gefnogi personél sy’n gwasanaethu ac sydd wedi gwasanaethu a’u teuluoedd.
Cadw’r Dyddiad
Eleni bydd yr apêl yn cael ei lansio am 9 o’r gloch ar fore Sul 25 Hydref yn Neuadd y Dref Wrecsam lle bydd gorymdaith i’r gofeb ryfel lle bydd gwasanaeth byr yn cael ei gynnal cyn dychwelyd i Neuadd y Dref am tua 9.45 am.
Bydd cyn-filwyr, eu teuluoedd, Hyrwyddwr y Lluoedd Arfog Cyngor Wrecsam, y Cynghorydd Beverley Parry-Jones a Maer Wrecsam, y Cynghorydd Jeremy Kent, yn bresennol yn y lansiad.
Bydd y digwyddiad hefyd yn cael ei gefnogi gan gangen Gogledd Cymru o Feicwyr Y Lleng Brydeinig Frenhinol a fydd yn gosod torchau ac wedyn mynd i wasanaethau eraill ar hyd a lled y rhanbarth.
Chwarae eich rhan
Gallwch gyfrannu at yr achos gwych hwn drwy brynu pabi o blith nifer o wahanol fathau o unrhyw un o’r mannau sy’n cymryd rhan.
Yn Neuadd y Dref, bydd pabïau enfawr yn cael eu harddangos ar y balconi i gyd-fynd â’r ymgyrch codi arian.
Dywedodd y Cynghorydd Beverley Parry-Jones, Hyrwyddwr y Lluoedd Arfog yng Nghyngor Bwrdeistref Sirol Wrecsam, “Bob blwyddyn, mae cefnogaeth pobl Wrecsam i Apêl y Pabi yn rhagorol. Mae’n gyfle i feddwl am y rhai a wnaeth yr aberth mwyaf posibl a diolch iddyn nhw am roi’r cyfle i ni fyw mewn heddwch. Rwy’n falch, unwaith eto, o fod yn rhan o’r ymgyrch codi arian wych hon a does gen i ddim amheuaeth y bydd yn flwyddyn lwyddiannus arall i’r apêl”.
Dywedodd y Cynghorydd Jeremy Kent, Maer Wrecsam, “Ar ôl treulio blynyddoedd lawer yn gweithio gyda’r lluoedd arfog, rwy’n gwbl ymwybodol o’r aberth eithaf y mae pobl Wrecsam wedi’i wneud yn y gorffennol a’r presennol i gadw ein gwlad yn ddiogel. Rwy’n annog cymaint o bobl â phosibl yn yr ardal i gyfrannu at y cyfnod hwn o goffau ac adfyfyrio.”
Fe’u Cofiwn
Eleni, bydd y Gwasanaeth Cofio Blynyddol yn cael ei gynnal ar ddydd Sul 8 Tachwedd am 10.55 a.m. ym Modhyfryd.
Mae gwahoddiad a chroeso i bawb fynychu wrth i ni ymgynnull i gofio.
Bydd Diwrnod y Cadoediad yn cael ei arsylwi ddydd Mawrth 11 Tachwedd ar Sgwâr y Frenhines ac mae aelodau o’r cyhoedd yn cael eu hannog i fod yn bresennol hefyd.
Bydd y seiren cyrch awyr yn cael ei seinio ar draws canol y ddinas am 11am ar 11 Tachwedd.
