Mae Wrecsam wedi bod yn dathlu Wythnos Fyd-eang Pontio’r Cenedlaethau 2026 gydag amrywiaeth o weithgareddau yn cael eu cynnal ledled y fwrdeistref rhwng 24 a 30 Ebrill.
Mae Wythnos Fyd-eang Pontio’r Cenedlaethau yn ymgyrch ryngwladol sy’n taflu goleuni ar fanteision dod â chenedlaethau at ei gilydd, gan annog cymunedau i ddathlu cysylltiad, dealltwriaeth a phrofiadau a rennir ar draws pob oedran.
Eleni, mae rhaglen Wrecsam yn cynnwys amrywiaeth eang o ddigwyddiadau sy’n adlewyrchu cryfder gwaith pontio’r cenedlaethau sydd eisoes yn digwydd yn lleol.
Mae’r gweithgareddau a gynlluniwyd drwy gydol yr wythnos yn cynnwys sesiynau creadigol, gweithgareddau lles, dysgu treftadaethol, ymgysylltu â phobl ifanc a phrosiectau cymunedol.
Ymhlith yr uchafbwyntiau mae sesiwn chwarae am ddim i blant dan 5 oed yng Nghastell y Waun, sesiwn les Groundwork Gogledd Cymru yng Nghlwb Pêl-droed Pen-y-Cae, a sesiwn gelf ‘Rhannu Sgil’ yn Erddig.
Bydd ‘Growing pots of kindness’, a gynhelir gan CIC – Done Together, hefyd yn digwydd ym Mharc Gwledig Dyfroedd Alun yng Ngwersyllt, lle gall cyfranogwyr addurno cerdyn a phlannu hedyn i’w roi i rywun yn y gymuned.
Mae gweithgareddau eraill yn ystod yr wythnos yn cynnwys disgo distaw, gan ddod â gofalwyr ifanc a chenedlaethau hŷn ynghyd trwy gerddoriaeth, sesiynau clwb ieuenctid sy’n pontio’r cenedlaethau, gweithgareddau Bowlio a Boccia sy’n cynnwys disgyblion ysgol o Ysgol Bro Alun.
Bydd y Comisiynydd Pobl Hŷn hefyd yn ymweld â sesiynau yng Nghanolfan Achub y Glowyr lle gall cyfranogwyr ddysgu mwy am dreftadaeth mwyngloddio Wrecsam trwy deithiau dan arweiniad cyn-achubwyr mwyngloddiau.
Mae’r rhaglen hefyd yn cynnwys gweithgareddau crefft tecstilau yn Erddig a chyfleoedd dysgu yng Ngholeg Cambria, sy’n cwmpasu pynciau fel Iechyd a Gofal Cymdeithasol, Saesneg a Mathemateg a Dysgu Cymraeg.
Dywedodd Rhian Bowen-Davies, Comisiynydd Pobl Hŷn Cymru “Rwy’n edrych ymlaen yn fawr at fod yn ôl yn Wrecsam i weld rhai o’r prosiectau gwych sydd ar y gweill sy’n dod â gwahanol genedlaethau ynghyd.”
“Mae mannau a gweithgareddau rhyng-genhedlaeth fel y rhain yn creu cysylltiadau cymdeithasol cryfach, yn ogystal â mwy o ymddiriedaeth a dealltwriaeth rhwng cenedlaethau, ac maent yn rhan allweddol o gymunedau sy’n gyfeillgar i oedran.”
