Lansiwyd menter Siarter Diogelwch Menywod yn y Nos Gogledd Cymru yn Nhŷ Pawb ddydd Mawrth 21 Ebrill.
Mae’r siarter wedi’i chynllunio i wella diogelwch i bob menyw sy’n gweithio neu’n ymweld â’r ddinas rhwng 6pm a 6am.
Bydd yn cefnogi lleoliadau i greu mannau mwy diogel a chroesawgar i fenywod yn economi’r nos.
Mae hefyd yn gwahodd busnesau lleol i fabwysiadu ymagwedd dim goddefgarwch at aflonyddu menywod.
Daeth llawer o randdeiliaid amrywiol a phartïon â diddordeb i’r digwyddiad. Cafwyd areithiau gan yr hyrwyddwr atal trais ar sail rhywedd, cam-drin domestig a thrais rhywiol, y Cynghorydd Beverley Parry-Jones, a Phrif Weithredwr CBSW, Alwyn Jones, ac yna ddarlleniad o farddoniaeth gan Natasha Boughton.
Mae manylion ar gyfer lleoliadau sydd am gofrestru ar gael drwy gysylltu â communitysafety@wrexham.gov.uk
Dywedodd yr hyrwyddwr atal trais ar sail rhywedd, cam-drin domestig a thrais rhywiol, y Cynghorydd Beverley Parry-Jones, “Mae’r siarter hwn yn cynrychioli carreg filltir i’n rhanbarth a cham ymlaen ar y cyd wrth gryfhau diogelwch a lles ar draws ein heconomi nos. Mae’r siarter hon yn fwy na rhestr wirio, mae’n bartneriaeth sydd â’r nod o wella diogelwch, hyder ac ymddiriedaeth i fenywod ar draws ein cymunedau. Ac mae’r nod hwnnw’n gyraeddadwy.”
Dywedodd Comisiynydd Heddlu a Throseddu Gogledd Cymru, Andy Dunbobbin, “Roeddwn i’n falch o gefnogi lansiad Siarter Diogelwch Menywod yn y Nos Gogledd Cymru ac o weld yr ymrwymiad parhaus i wella diogelwch menywod ar draws economi’r nos. Mae’r tîm wedi gweithio’n galed dros gyfnod hir i wireddu’r Siarter ac rwy’n cymeradwyo eu hymdrechion, a’r gwahaniaeth y bydd y Siarter yn ei wneud i brofiadau menywod yn Wrecsam ac ar draws Gogledd Cymru. Mae digwyddiadau fel hyn hefyd yn helpu i dynnu sylw at rôl hanfodol y gwasanaethau a gomisiynwyd a oedd yn bresennol yn y lansiad, fel y Ganolfan Cymorth i Ddioddefwyr a BAWSO, sy’n darparu cymorth hanfodol i’r rhai yr effeithir arnynt gan drais a chamdriniaeth. Rwy’n edrych ymlaen at weld y Siarter yn tyfu ac yn datblygu ymhellach dros y misoedd nesaf ac rwy’n annog lleoliadau, busnesau a sefydliadau i gofrestru ac ymuno â’r Siarter.”
Daeth yr Uwch-arolygydd Mark Williams i’r digwyddiad ochr yn ochr â’r Prif Arolygydd Caroline Mullen-Hurst, Arolygydd Dinas Wrecsam Rhodri Ifans, yr Arolygydd Claire McGrady a’r Sarjant Sarah Hughes-Jones, a oedd yn allweddol wrth gefnogi’r awdurdod lleol a phartneriaid i greu’r Siarter.
Dywedodd yr Uwch-arolygydd Mark Williams, “Mae gan bob menyw hawl i deimlo’n ddiogel wrth fwynhau noson allan neu weithio yn economi’r nos.”
“Rydym yn falch o gefnogi’r fenter hon sydd wedi’i chynllunio i gynnig sicrwydd a chefnogaeth, gwella diogelwch menywod, a chreu amgylchedd sy’n ddiogel, yn gynhwysol ac yn barchus i bawb.
“Rydym wedi ymrwymo i roi terfyn ar bob achos o drais yn erbyn menywod a merched a byddem yn annog unrhyw un i roi gwybod am unrhyw achos o aflonyddu neu ymosodiad rhywiol y maent wedi’i brofi neu ei weld.
“Fodd bynnag, nid ymateb i ddigwyddiadau yn unig yw pwrpas hyn, ond creu diwylliant o ddiogelwch ar draws bywyd nos Wrecsam.”
