Erthygl Gwadd – Network Rail
Bydd Network Rail yn gwneud gwaith peirianneg hanfodol, gan effeithio ar wasanaethau rhwng Bidston, Wrecsam a’r Amwythig o ddydd Sul 16 Awst tan ddydd Sul 30 Awst.
Bydd y llinellau canlynol yn cau:
- Dydd Sul 16 Awst – Dydd Sul 30 Awst – Wrecsam Cyffredinol/Canolog i Bidston
- Dydd Llun 17 Awst – Dydd Sul 30 Awst – Wrecsam Cyffredinol i Amwythig
Bydd y llinellau hyn yn ailagor ddydd Llun 31 Awst.
Bydd Network Rail yn gwneud gwaith i ddau leoliad sy’n cael eu heffeithio dro ar ôl tro gan lifogydd, ger Gobowen a Babbinswood. Byddant hefyd yn gwneud gwaith atgyweirio strwythurol ac yn ailosod y trac ar bont droi Penarlâg a gwaith cyffredinol i wella’r llwybr.
Newidiadau i wasanaethau rheilffordd
Bidston i Wrecsam Cyffredinol/Canolog – Dydd Sul 16 i Ddydd Sul 30 Awst
Ni fydd unrhyw drenau yn rhedeg rhwng Wrecsam Cyffredinol/Canolog a Bidston rhwng dydd Sul 16 Awst a dydd Sul 30 Awst, gyda gwasanaethau trên yn rhedeg fel arfer o ddechrau’r gwasanaeth ddydd Llun 31 Awst.
Gwasanaethau yn lle’r trenau: Bydd bysus yn lle’r trenau rhwng Bidston a Wrecsam Cyffredinol/Canolog, gan redeg bob ryw 45 munud o ddydd Llun i ddydd Sadwrn, a bob awr ar ddydd Sul.
Bydd bysus dros dro hefyd yn gwasanaethu gorsaf Gogledd Penbedw ar gyfer cysylltiadau â gwasanaethau Merseyrail i Lerpwl.
Wrecsam Cyffredinol i Amwythig – Dydd Llun 17 i Ddydd Sul 30 Awst
Ni fydd unrhyw drenau yn rhedeg rhwng Amwythig a Wrecsam o ddydd Llun 17 i ddydd Sul 30 Awst, gyda gwasanaethau trên yn rhedeg fel arfer o ddechrau’r gwasanaeth ddydd Llun 31 Awst. Bydd gwasanaethau rheilffyrdd rhwng Crewe a Wrecsam Cyffredinol yn gweithredu bob ryw awr.
Gwasanaethau yn Lle’r Trenau: Bydd bysus yn lle’r trenau rhwng Amwythig a Wrecsam Cyffredinol, gan redeg bob ryw awr o ddydd Llun i ddydd Sadwrn, a hyd at bob dwy awr ar ddydd Sul.
Bydd rhai gwasanaethau yn cael eu hymestyn i Gaer.
Gwasanaethau pellter hir rhwng Gogledd Cymru a Chaerdydd
Bydd gwasanaethau pellter hir o Birmingham/ Caerdydd i Gaergybi/ Llandudno yn dargyfeirio trwy Crewe. Efallai y bydd gwasanaethau yn cymryd ychydig yn hirach na’r arfer, ac felly rydym yn annog teithwyr sy’n teithio ar hyd y llwybrau hyn i wirio cyn iddynt deithio gan ddefnyddio Gwefan neu ap Network Rail.
Mae hyn hefyd yn golygu y bydd gwasanaethau gwennol o Crewe i Amwythig yn cael eu hail-amseru o ryw 30 munud.
Gêm Bêl-droed Dinas Caerdydd yn erbyn Clwb Pêl-droed Wrecsam – Dydd Llun 17 Awst
Mae cau llinellau rheilffordd yn digwydd yr un pryd â gêm gyntaf oddi cartref Clwb Pêl-droed Wrecsam o’r tymor newydd. Rydym yn gweithio’n galed i gefnogi cwsmeriaid sy’n teithio i’r gêm ac oddi yno, gan gynnwys rhedeg gwasanaeth ychwanegol o Gaerdydd i Wrecsam, a fyddai’n cael ei ailgyfeirio trwy Crewe a Chaer ac felly bydd yn cymryd ychydig yn hirach nag arfer.
Bydd y daith yn ôl yn gadael Caerdydd Canolog am 22:36 a bydd yn rhedeg i Wrecsam Cyffredinol (yn cyrraedd 02:07) drwy Amwythig (yn cyrraedd 00:42), Crewe a Chaer. Darperir gwasanaeth bws yn Amwythig (yn gadael 00:55) sy’n teithio i Gobowen, y Waun a Rhiwabon.
Canllawiau i deithwyr sy’n defnyddio Talu wrth Fynd (PAYG)
Rhaid bod gan deithwyr docyn dilys cyn teithio ar wasanaethau bws yn lle’r trenau. Bydd timau allan ar draws y rhwydwaith i ddarparu cymorth i deithwyr. Mae Talu wrth fynd diogelu refeniw yn parhau ar gael rhwng Bidston a Wrecsam Canolog. Dylai teithwyr dapio i mewn ac allan gan ddefnyddio dilyswyr platfform yr orsaf fel arfer a gallant gywiro tapiau a gollwyd trwy ap neu wefan TC ar ôl y diwrnod. Er mwyn cefnogi cwsmeriaid yn ystod yr aflonyddwch, bydd y terfyn cywiro tapiau a gollwyd misol yn cynyddu dros dro o 6 i 14 ym mis Awst.
Dywedodd y Cynghorydd David A Bithell, Aelod Arweiniol dros yr Amgylchedd, “Yn anffodus, bydd y gwaith hwn yn golygu tarfu sylweddol i bobl sy’n teithio i ac o Wrecsam dros y pythefnos nesaf, felly byddwn yn annog teithwyr i gynllunio eu teithiau ymlaen llaw a chaniatáu amser ychwanegol lle bo angen.
Bydd gwasanaethau bysus yn lle’r trenau yn gweithredu ar lwybrau yr effeithir arnynt, ond gall amseroedd teithio fod yn hirach nag arfer. Gwiriwch y wybodaeth deithio ddiweddaraf cyn cychwyn, yn enwedig os ydych chi’n gwneud taith hirach neu’n teithio i gêm Clwb Pêl-droed Wrecsam yng Nghaerdydd.” Mae rhagor o wybodaeth am y newidiadau hyn ar gael ar wefan Trafnidiaeth Cymru.
