Mae paratoadau ar y gweill ar gyfer dechrau’r gwaith ar y parc bysus newydd yn Sant Marc yn Wrecsam.
Mae’r gwaith ailddatblygu yn cael ei gynnal gan Read Construction ar ran Cyngor Wrecsam, a bydd yn trawsnewid yr hen faes parcio aml-lawr yn gyfleuster parcio bysus newydd, gyda gwell llwybrau mynediad i’r cyhoedd a gwell tirlunio i gefnogi diwydiant twristiaeth cynyddol y ddinas.
Ychwanegodd y Cynghorydd Mark Pritchard, Arweinydd y Cyngor: “Fe wnaethon ni brynu Sant Marc i’w ailddatblygu yn gynharach eleni, gan ein bod yn gallu gweld bod gan y safle botensial enfawr.
“Rwy’n falch iawn bod y gwaith yn symud ymlaen a bydd creu parc bysus pwrpasol yn newid mawr i’r amgueddfa a’r economi ymwelwyr ehangach yng nghanol y ddinas.”
Dywedodd y Cynghorydd Nigel Williams, yr Aelod Arweiniol dros Fusnes, yr Economi a Thwristiaeth: “Mae’r cynllun yn cael ei ariannu gan fenter Trawsnewid Trefi Llywodraeth Cymru, a bydd yn creu gwell cysylltiadau canol y ddinas, tra’n darparu seilwaith hanfodol i gefnogi Amgueddfa Bêl-droed Cymru newydd a thwf parhaus y ddinas fel cyrchfan i ymwelwyr.
“Mae’n gyfnod cyffrous i Wrecsam.”
Gwaith dymchwel yn dechrau ym mis Medi
Mae disgwyl i’r gwaith ddechrau o ddifrif yng nghanol mis Medi, gyda disgwyl i waith dymchwel yr hen adeilad aml-lawr gymryd tua 11 wythnos, cyn i’r safle gael ei ailddatblygu i’r parc bysus newydd.
Fel bob amser, mae’r cyngor a Read Construction yn gofyn i bawb barchu ffin y safle ac i ddeall peryglon tresmasu mewn ardal adeiladu.
Dywedodd Karen Heaton Morris, Cyfarwyddwr Read Construction: “Fel contractwr o Wrecsam, mae’n wych bod yn cyflawni prosiect a fydd yn cefnogi twf parhaus y ddinas fel cyrchfan i ymwelwyr.
“Bydd y parc bysus newydd yn darparu seilwaith pwysig i Wrecsam, gan wella mynediad i ganol y ddinas a gwella’r profiad i ymwelwyr.
“Trwy gydol y gwaith, byddwn yn gweithio’n agos gyda thrigolion lleol, busnesau a rhanddeiliaid i leihau aflonyddwch lle bynnag y bo modd, a sicrhau bod unrhyw gau angenrheidiol neu newidiadau i drefniadau mynediad yn cael eu cyfathrebu’n glir ymhell ymlaen llaw.”
“Rydym yn falch iawn o fod yn cyflawni prosiect arall a fydd yn gadael etifeddiaeth bwysig i Wrecsam.”
Sylwch y bydd mynediad i gerddwyr ar gau o’r Werddon i Stryt y Rhaglaw rhwng 14 Medi a Gwanwyn 2027 er mwyn caniatáu i’r gwaith ddigwydd.
Bydd mynediad i gerbydau hefyd ar gau o Stryd Sant Marc i Stryt y Rhaglaw yn ystod yr un cyfnod.
