Mae’r gwaith o ailddatblygu Amgueddfa Wrecsam yn cychwyn pennod newydd gyffrous, gyda’r dyddiad agor ar gyfer yr amgueddfa newydd nodedig a’r atyniad cenedlaethol i ymwelwyr bellach wedi’i gadarnhau.
Rydym yn falch iawn o gyhoeddi mai dyddiad agor Amgueddfa Bêl-droed Cymru ac Amgueddfa Wrecsam fydd dydd Gwener 25 Medi 2026. Bydd y weithdrefn archebu tocynnau am ddim yn cael ei chyhoeddi yn y dyddiau nesaf.
Bydd yr agoriad yn garreg filltir bwysig i Wrecsam, gan ddod â straeon, treftadaeth a chymunedau’r ddinas at ei gilydd, ynghyd â hanes pêl-droed cyfoethog Cymru mewn profiad amgueddfa newydd uchelgeisiol.
Gwahoddir ymwelwyr i gadw llygad allan am gyhoeddiadau sydd ar ddod am yr amgueddfa, a sut i archebu tocynnau am ddim i ymweld ag atyniad newydd Wrecsam na ellir ei golli, lle gallwch ymgolli mewn hanes pêl-droed a threftadaeth leol.
Heledd Fychan, Dywedodd Gweinidog y Cabinet dros Ddiwylliant a Chwaraeon: “Mae hon yn garreg filltir fendigedig – bydd Amgueddfa Bêl-droed Cymru ac Amgueddfa Wrecsam yn atyniad nodedig, gan ddod â threftadaeth bêl-droed ein gwlad yn fyw tra’n dathlu hanes a chymunedau cyfoethog Wrecsam.
“Mae’n wych bod cefnogaeth Llywodraeth Cymru, gyda chefnogaeth cyllidwyr eraill, wedi helpu i wneud y prosiect uchelgeisiol hwn yn bosibl. Rwy’n edrych ymlaen at ymweld unwaith y bydd y drysau’n agor ym mis Medi, a byddwn yn annog pawb o Wrecsam – a ledled Cymru – i ddod i brofi’r lleoliad newydd gwych hwn drostynt eu hunain.”
Dywedodd y Cynghorydd Mark Pritchard, Arweinydd Cyngor Wrecsam: “Mae trawsnewid Amgueddfa Wrecsam yn brofiad treftadaeth o’r radd flaenaf, ac agor Amgueddfa Bêl-droed Cymru, wedi gwneud hwn yn brif leoliad yma yn Wrecsam. Roedd llawer o gystadleuaeth ledled Cymru i ddod o hyd i’r cartref iawn i’r Amgueddfa Bêl-droed. Rydym yn falch bod Llywodraeth Cymru wedi ymddiried yn Wrecsam – man geni pêl-droed Cymru – i ddathlu ei threftadaeth i ymwelwyr cenedlaethol a rhyngwladol ei fwynhau.
“Mae’r cyfan wedi bod yn bosibl trwy gyllid gan Lywodraeth Cymru, Cronfa Treftadaeth y Loteri Genedlaethol, Trawsnewid Trefi Llywodraeth Cymru, Cronfa Ffyniant Gyffredin Llywodraeth y DU, Sefydliad Wolfson, Cronfa Grantiau Prynu a Chyngor Wrecsam, a hoffwn ddiolch iddynt i gyd am eu cyllid a’u cymorth.
“Hoffwn hefyd ddiolch i’r holl staff sydd wedi rhoi llawer o waith i wireddu’r prosiect hwn, ac edrychaf ymlaen at weld pawb yn gwneud y gorau o’r atyniad newydd cyffrous hwn yng nghanol y ddinas.”
Gan adlewyrchu balchder cenedlaethol ar y cae pêl-droed a thynnu sylw at straeon a chymunedau lleol, mae Amgueddfa Bêl-droed Cymru ac Amgueddfa Wrecsam yn lleoliad o’r radd flaenaf a fydd yn cynnig profiad diddorol a chofiadwy i ymwelwyr.
Meddai’r Cynghorydd Paul Roberts, Aelod Arweiniol Phartneriaethau a Diogelwch Cymunedol: “Mae’r ailddatblygiad yn cynrychioli buddsoddiad sylweddol yng nghynnig diwylliannol Wrecsam, a bydd yn dod yn gyrchfan newydd boblogaidd i drigolion ac ymwelwyr yn gyflym, gan ddathlu’r bobl, y lleoedd, y straeon a’r cyflawniadau chwaraeon sydd wedi helpu i lunio’r sir a chymunedau pêl-droed ledled Cymru.”
Mae’r atyniad ymwelwyr newydd yn lleoliad trawiadol ac yn ased enfawr i’r rhanbarth, gan gynnig cyrchfan newydd arwyddocaol i ymwelwyr â Wrecsam a Gogledd Cymru ei chynnwys yn eu cynlluniau hamdden a theithio.
Mae’r trawsnewidiad wedi creu profiad amgueddfa hollol newydd o fewn Adeiladau’r Sir hanesyddol, gan ddod ag Amgueddfa Bêl-droed Cymru ac Amgueddfa Wrecsam ynghyd mewn lleoliad wedi’i ehangu a’i foderneiddio’n sylweddol.
Ian Jones, Prif Swyddog Economi a Chynllunio, Cyngor Wrecsam “Mae diddordeb aruthrol yn yr amgueddfa newydd o bob cwr; rydym wedi derbyn negeseuon gan ymwelwyr rhyngwladol sy’n awyddus i gael cipolwg ar gasgliad Cenedlaethol Pêl-droed Cymru tra byddant yn yr ardal. Gyda’r dyddiad agor swyddogol bellach wedi’i ddatgelu, edrychwn ymlaen at groesawu pawb i edrych ar y gofod newydd ymdrochol, cofiadwy hwn, a’i fwynhau.”
Bydd pawb a oedd yn gyfarwydd â’r amgueddfa wreiddiol yn rhyfeddu at raddfa’r ehangiad ac ansawdd y gosodiad sydd wedi’i gyflawni o fewn Adeiladau’r Sir gwreiddiol. Mae’r ailddatblygiad wedi cadw cymeriad a threftadaeth yr adeilad Rhestredig Gradd II, wrth greu profiad ymwelwyr cyfoes sydd wedi’i gynllunio i apelio at gymunedau lleol, cefnogwyr pêl-droed ac ymwelwyr o bob cwr o Gymru a thu hwnt.
Alwyn Jones, Prif Weithredwr Cyngor Wrecsam: “Rydym yn anhygoel o falch o’r proffesiynoldeb, y gwaith caled a’r ymroddiad gan dîm yr amgueddfa sy’n ehangu. Mae hwn yn gymaint mwy na gwaith adnewyddu, mae’n lleoliad hollol newydd yr ydym mor falch ohono, ac yn edrych ymlaen yn fawr at eich croesawu iddo. Bydd pawb a oedd yn gyfarwydd â’r amgueddfa wreiddiol yn rhyfeddu at yr ehangiad ac ansawdd y gwaith adfer sydd wedi’i wneud o fewn Adeiladau’r Sir gwreiddiol.”
Bydd y rheini sy’n mynd heibio yn sylwi ar arwyddion cynyddol sy’n nodi ei bod bron yn barod, wrth i’r amgueddfa gael ei datgelu i’r cyhoedd. Gyda disgwyl i’r paneli amddiffynnol gael eu tynnu ddiwedd mis Awst a’r paratoadau mewnol yn agosáu at eu cwblhau, bydd tîm yr amgueddfa yn barod i agor y drysau am 10am ar 25 Medi 2026.
Bydd rhagor o fanylion am yr agoriad, y profiad i ymwelwyr a’r trefniadau tocynnau yn cael eu cyhoeddi yn ystod yr wythnosau nesaf.
Gwnaed Amgueddfa Bêl-droed Cymru ac Amgueddfa Wrecsam yn bosibl trwy gefnogaeth ein cyllidwyr:
Llywodraeth Cymru, Cronfa Dreftadaeth y Loteri Genedlaethol, Trefi Trawsnewid Llywodraeth Cymru, Cronfa Ffyniant Gyffredin Llywodraeth y DU, Sefydliad Wolfson*, Cronfa Grant Prynu V&A, a Chyngor Bwrdeistref Sirol Wrecsam.
Dilynwch sianeli cyfryngau cymdeithasol ‘Amgueddfa Bêl-droed Cymru ac Amgueddfa Wrecsam’ ar gyfer diweddariadau:
Facebook: @AmgueddfaBel-droedCymru @AmgueddfeyddWrecsam
Instagram: @amgueddfabel-droedcymru @amgueddfawrecsam
Bluesky: Amgueddfa Bêl-droed Cymru Amgueddfeydd Wrecsam
Twitter/X: @FootyMuseumWal
