Llywodraeth Cymru yn cyhoeddi £5 miliwn o gyllid ar gyfer Stryt Henblas, hen safle’r Hippodrome a Stryt Caer, i adeiladu parc diwylliannol newydd yng nghanol y ddinas…
Mae Llywodraeth Cymru wedi cyhoeddi pecyn cyllid mawr i helpu i drawsnewid rhan allweddol o ganol dinas Wrecsam.
Bydd yr arian yn cael ei ddefnyddio i drawsnewid yr ardal o amgylch Stryt Henblas, hen safle’r Hippodrome a Stryt Caer – gyda phalmentydd, celfi stryd, coed a mannau gwyrdd newydd.
Bydd hen safle’r Hippodrome hefyd yn cynnwys seddi haenog, gwaith tirlunio, sgrin awyr agored fawr a nodweddion dŵr.
Yn gyrru’r fenter mae gweledigaeth Cyngor Wrecsam o ardal ddiwylliannol newydd fywiog yng nghanol y ddinas – gan helpu i gefnogi economi’r dydd a’r nos, a meithrin hunaniaeth gryfach ar gyfer Wrecsam fel lle gyda marchnadoedd Fictoraidd traddodiadol, treftadaeth, celfyddydau a diwylliant.
Mae’r prosiect hefyd yn cyd-fynd â ‘Chynllun Creu Lleoedd’ y Cyngor, a nododd y potensial ar gyfer y math hwn o ddatblygiad yng nghanol y ddinas.
Cyhoeddodd Siân Gwenllian, Gweinidog y Cabinet dros Lywodraeth Leol, Tai a Chynllunio, y cyllid yn ystod ymweliad â’r ddinas yn gynharach heddiw, ac mae uwch arweinwyr Cyngor Wrecsam wedi croesawu’r newyddion.
Dywedodd Gweinidog Cabinet dros Lywodraeth Leol, Tai a Chynllunio, Siân Gwenllian: “Mae wedi bod yn bleser gwirioneddol ymweld â Thŷ Pawb a gweld yr effaith drawsnewidiol y mae’r gofod hwn wedi’i chael ar gymuned greadigol Wrecsam.
“Mae cwrdd ag artistiaid wedi’i leoli yno wedi dangos i mi yn union beth y gellir ei gyflawni pan fyddwn yn buddsoddi yng nghanol ein trefi, nid yn unig mewn brics a morter, ond yn y bobl a’r syniadau sy’n dod â nhw’n fyw.
“Bydd y cyllid hwn yn helpu i adeiladu ar y gwaith gwych rydyn ni eisoes yn ei weld yn Wrecsam, gan gefnogi busnesau lleol, rhoi hwb i’r nifer o ymwelwyr a chreu mannau y gall cymunedau ymfalchïo ynddynt. Mae hefyd yn adlewyrchu’r blaenoriaethau a nodir gan ein Tasglu Canol Trefi, sy’n helpu i sicrhau bod adfywio yn cael ei yrru gan yr hyn sydd ei angen ar gymunedau mewn gwirionedd.”
Dywedodd y Cynghorydd Mark Pritchard, Arweinydd y Cyngor: “Hoffwn ddiolch i Sian Gwenllian a Llywodraeth Cymru am gefnogi Wrecsam a chydnabod y potensial enfawr sydd gan y ddinas hon i’w gynnig.
“Rydym eisoes wedi cyflawni nifer o gynlluniau adfywio mawr gyda chefnogaeth Llywodraeth Cymru, gan gynnwys y marchnadoedd dan do, y Stryt Fawr, hwb creadigol yr Hen Lyfrgell a’r amgueddfa.
“Bydd y cynlluniau cyffrous sydd gennym ar gyfer Stryt Henblas, hen safle’r Hippodrome a Stryt Caer yn ddarn arall o’r jig-so, wrth i ni geisio helpu Wrecsam i wireddu ei gwir botensial fel dinas fodern, hyderus.”
Bydd y prosiect yn cael ei ariannu’n gan Lywodraeth Cymru a ffynonellau cyllid eraill, ac mae’r Cyngor yn gobeithio dechrau ar y gwaith cyn diwedd y flwyddyn.
Ychwanegodd y Cynghorydd Nigel Williams, yr Aelod Arweiniol dros yr Economi, Busnes a Thwristiaeth: “Mae’r pecyn ariannol hwn gan Lywodraeth Cymru yn allweddol iawn, ac yn nodi dechrau’r bennod gyffrous nesaf i Wrecsam.
“Rydym yn gobeithio adeiladu ar wedd a theimlad y Stryt Fawr, a gafodd ei hailwampio tua 18 mis yn ôl, a byddwn yn defnyddio’r un math o balmentydd, seddi amffitheatr awyr agored i greu gofod perfformio, planhigion a nodweddion chwarae fel ffynhonnau dŵr.
“Bydd Stryt Henblas a Stryt Caer yn teimlo’n fodern ac yn ddeniadol, a bydd hen safle’r Hippodrome yn ased gwych – perffaith ar gyfer teuluoedd a gweithgareddau cymunedol.”
Hanes safle’r Hippodrome
Mae hen safle’r Hippodrome wedi bod yn bwnc llosg yn ystod y blynyddoedd diwethaf, a bydd llawer o bobl yn Wrecsam yn cofio hen sinema’r Hippodrome gyda hiraeth gynnes. Caeodd y sinema yn y 1990au a llosgwyd yr adeilad yn 2008.
Ers 2023, mae’r safle wedi bod yn gysylltiedig â Hollywood ar ôl i Rob McElhenney gyhoeddi cynigion ar gyfer Parc Coffa Ryan Rodney Reynolds – man cymunedol a enwyd er anrhydedd i’w gydberchennog Clwb Pêl-droed Wrecsam.
Yn gynharach eleni, cyhoeddodd y Cyngor y byddai’n symud ymlaen gyda chefnogaeth cwmni Rob, More Better, ac yn edrych ar sut y gall drawsnewid y safle fel rhan o brosiect ehangach sy’n cynnwys Stryt Henblas a Stryt Caer.
