Mae Credu yn cefnogi gofalwyr ifanc yn Wrecsam ac wedi’i ariannu gan Gyngor Bwrdeistref Sirol Wrecsam.
Mae Credu yn tynnu at derfyn eu prosiect Gwneud i Ofalwyr Gyfrif sydd wedi canolbwyntio ar godi ymwybyddiaeth am Ofalwyr Ifanc mewn ysgolion, yn eu cymuned ac yn genedlaethol.
Mae’r prosiect wedi cyrraedd uchafbwynt gydag arddangosfa bortreadau sydd i’w gweld yn Tŷ Pawb yn Wrecsam. Mae hi’n gyfres o ffotograffau o Ofalwyr Ifanc gyda’u teuluoedd, yn chwarae, chwerthin a chreu cysylltiad.
Fe wnaeth Credu gomisiynu cwmni cynhyrchu ffilmiau Barrow Boys, a wnaeth y gwaith yn sensitif ac yn hyblyg. Roedd y teuluoedd yn cyfarfod â’u ffotograffydd ble bynnag roedden nhw’n teimlo fwyaf cyfforddus.
Roedd Credu yn teimlo ei bod yn bwysig dangos y teuluoedd mewn modd naturiol; boed hynny’n chwareus, yn gariadus, yn swil neu’n gwneud llanast, a chynrychioli’r gofalwr neu ofalwyr ifanc ym mhob aelwyd yng nghyd-destun eu teulu.
Dyma rywfaint o’r adborth gan y teuluoedd:
“Doeddwn i erioed wedi meddwl y byddai posib’ cael lluniau fel ’na ohonyn nhw. Mae hi’n gas gan fy mab y camera fel arfer.”
“Maen nhw i gyd yn arbennig. Mae o wedi’u dal nhw i gyd mor dda! Dw i’n teimlo mor ffodus bod ein teulu ni wedi bod yn rhan o’r cyfan.”
“Mae’r rhain yn wych! Diolch yn fawr! Maen nhw yn sicr yn dangos y cariad a’r anhrefn i gyd mewn un.”
Mae’r lluniau’n hyfryd ac yn dathlu a thaflu goleuni ar yr amrywiaeth sy’n rhan o fod yn ifanc a bod â rôl ofalu.
Agorwyd yr arddangosfa ddydd Iau 28 Mawrth gyda’r Cynghorydd Rob Walsh, Aelod Arweiniol Gwasanaethau Plant, a’r Cynghorydd Phil Wynn, Aelod Arweiniol Addysg yn Wrecsam, a’r ddau yno i gyfarfod â’r teuluoedd.
Dywedodd y Cyng. Rob Walsh, Aelod Arweiniol Gwasanaethau Plant: “Mae’r arddangosfa’n arddangos bywydau gofalwyr ifanc mewn ffordd naturiol yn wych. Mae’r lluniau’n llawn hapusrwydd a chariad a phleser oedd cyfarfod efo’r gofalwyr ifanc a gweld y lluniau arbennig yn yr arddangosfa.”
Dywedodd y Cyng. Phil Wynn, Aelod Arweiniol Addysg: “Mae gofalwyr ifanc yn ysgwyddo llawer o gyfrifoldebau oedolyn felly mae’r gefnogaeth mae Credu (Gofalwyr Ifanc WCD) yn ei rhoi’n wasanaeth arbennig sy’n caniatáu i blant gael bod yn blant.
“Mae’r lluniau sydd i’w gweld wir yn dangos ochr chwareus, hapus y teuluoedd fu’n rhan o’r prosiect a byddwn yn annog pawb i alw draw i Tŷ Pawb i gael golwg arnynt a dysgu mwy am waith ardderchog ein gwasanaeth gofalwyr ifanc.”
Bydd yr arddangosfa bortreadau i’w gweld yn Tŷ Pawb yn Wrecsam tan 30 Ebrill 2024.
Mae Credu hefyd wedi bod yn cynnal gweithdai geiriau llafar, wyneb yn wyneb yn Llandudno ac ar-lein gyda’r bardd Martin Daws, sy’n byw yng Ngogledd Cymru. I glywed rhywfaint o’r recordiad a’r testun ysgrifenedig, cliciwch ar https://padlet.com/creduteam/credu-young-and-young-adult-carers-creativity-6weznjfeef4859t9
I gael rhagor o wybodaeth, anfonwch e-bost at carers@credu.cymru neu sally@credu.cymru neu ewch i https://rb.gy/n1xur7.
Dysgwch fwy am newid i linellau tir digidol yng nghanolfan Tŷ Pawb (wrecsam.gov.uk)
Derbyniwch y newyddion a’r wybodaeth ddiweddaraf yn syth i’ch mewnflwch.
