Mae Cyngor Wrecsam yn gwahodd arweinwyr cymunedol a busnes i ymuno â ‘Bwrdd Tref / Dinas’ newydd i helpu i oruchwylio rhaglen fuddsoddi 10 mlynedd a ariennir gan Lywodraeth y DU.
Mae Wrecsam yn un o 55 o drefi/dinasoedd ar draws y DU a ddewiswyd i gymryd rhan yn y fenter Cynllun Hirdymor ar gyfer Trefi.
Mae’n golygu y gallai’r ddinas dderbyn hyd at £20 miliwn dros y 10 mlynedd nesaf i helpu i gyflawni blaenoriaethau lleol.
Bydd y bwrdd newydd yn goruchwylio’r gwaith drwy ddatblygu ‘Cynllun Hirdymor ar gyfer Wrecsam’, ac mae swyddogion y cyngor bellach yn gweithio i recriwtio aelodau cyn y dyddiad cau sef 1 Ebrill.
Dywedodd y Cynghorydd Mark Pritchard, Arweinydd Cyngor Wrecsam: “Rydym am gael amrywiaeth o arweinwyr cymunedol a busnes deinamig i eistedd ar y bwrdd hwn a helpu Wrecsam i wneud y gorau o’r cyfle gwych hwn.
“Bydd y bwrdd yn cyfarfod bedair gwaith y flwyddyn ac yn gosod yr agenda strategol – gan nodi pa flaenoriaethau lleol y bydd y cyllid yn cael ei fuddsoddi ynddynt.
“Hoffwn ddiolch i Lywodraeth y DU a’n AS Sarah Atherton am ei chefnogaeth ar y prosiect hwn, yn ogystal â swyddogion y cyngor, partneriaid a phawb arall sy’n gweithio’n galed y tu ôl i’r llenni.”
Ychwanegodd y Cynghorydd Nigel Williams, Aelod Arweiniol yr Economi: “Mae llawer yn digwydd yn Wrecsam ar hyn o bryd – gyda llygaid y byd arni, llwyddiant ym maes chwaraeon a phrosiectau adfywio mawr – ac mae hwn yn gyfle euraidd arall i adeiladu ar yr hyder hwnnw a chadw’r momentwm.”
Dywedodd AS Wrecsam, Sarah Atherton:“Mae’r Gronfa Trefi gwerth £20 miliwn yn dangos eto ymrwymiad Llywodraeth y DU i Wrecsam.
“Ar hyn o bryd, mae llawer iawn o waith cynllunio ar gyfer adnewyddu canol ein dinas ac rwy’n awyddus i weld hyn yn cael ei gyflawni cyn gynted â phosibl.
“Mae hwn yn gyfle gwych i drawsnewid Wrecsam er gwell ac rwy’n awyddus i weithio law yn llaw â’r bwrdd a phob rhan o’n cymuned i yrru cynnydd yn ei flaen.”
Mae disgwyl i’r aelodaeth derfynol gael ei chadarnhau gan Fwrdd Gweithredol Cyngor Wrecsam ym mis Ebrill.
Gallwch ddarllen mwy am fenter y Cynllun Hirdymor ar gyfer Trefi ar wefan Llywodraeth y DU.
