Bydd angen i drigolion yn Wrecsam ddangos ID ffotograffig i bleidleisio mewn etholiadau lleol ar 2 Mai. Mae trigolion yn cael eu hannog i wneud yn siŵr eu bod yn barod i bleidleisio trwy wirio bod ganddynt fath o ID a dderbynnir.
Mae mathau o ID a dderbynnir yn cynnwys pasbort neu drwydded yrru a gyhoeddwyd gan y DU, yr Ardal Economaidd Ewropeaidd (AEE) neu’r Gymanwlad; a rhai pasys teithio rhatach megis pas bws person hŷn neu gerdyn Oyster 60+. Bydd pleidleiswyr yn gallu defnyddio ID nad yw’n gyfredol os oes modd eu hadnabod o’u ffotograff o hyd.
Gallwch ddod o hyd i’r ffurf fwyaf addas o brawf adnabod â llun yn y fideo hwn:
Bydd unrhyw un nad oes ganddo un o’r mathau o ID a dderbynnir yn gallu gwneud cais am ID am ddim ar-lein drwy cymraeg.voter-authority-certificate.service.gov.uk neu drwy lenwi ffurflen bapur.
Mae’r rhestr lawn o ID a dderbynnir ar gael ar wefan y Comisiwn Etholiadol, ynghyd â rhagor o wybodaeth am y gofyniad newydd a manylion am sut i wneud cais am yr ID am ddim, drwy electoralcommission.org.uk/id-pleidleisiwr.
Dywedodd Jackie Killeen, Cyfarwyddwr y Weinyddiaeth Etholiadol a Chanllawiau: “Bydd angen i unrhyw un sy’n pleidleisio mewn gorsaf bleidleisio ddangos ID ffotograffig cyn y gellir rhoi ei bapur pleidleisio iddo. Mae’n bwysig bod pawb yn deall pa fathau o ID y gallant eu defnyddio, a sut i wneud cais am ID am ddim os oes ei angen arnynt. Gallwch ddod o hyd i wybodaeth am y gofyniad newydd a beth i’w ddisgwyl yn yr orsaf bleidleisio, ar wefan y Comisiwn Etholiadol.”
Dywedodd Ian Bancroft Swyddog Canlyniadau Cyngor Wrecsam: “Gydag etholiadau’n cael eu cynnal yn Wrecsam ar 2 Mai 2024, mae’n bwysig bod y rhai sydd eisiau pleidleisio yn gwneud yn siŵr bod ganddynt fath o ID a dderbynnir. Gall ymddangos yn gynnar ond mae gwirio nawr yn golygu y byddwch yn barod i bleidleisio ym mis Mai.
“Bydd preswylwyr sydd heb un o’r ffurfiau o brawf adnabod â llun a dderbynnir yn gallu gwneud cais am ID am ddim un ai ar-lein neu drwy lenwi ffurflen gais ar bapur a’i anfon at dîm gwasanaethau etholiadol Wrecsam. Os ydych angen unrhyw gymorth gyda gwneud cais am ID am ddim neu eisiau gwneud cais am ffurflen gais, cysylltwch â’r tîm gwasanaethau etholiadol ar e-bost electoral@wrexham.gov.uk neu ffoniwch 01978 292020.”
Mae’r rheolau ynghylch darparu pleidleisiau post wedi newid eleni, darllenwch Sut i bleidleisio os na allwch ddod i orsaf bleidleisio? i ddarganfod mwy.
Mae unrhyw un sydd eisiau lleisio eu barn yn yr etholiadau’r mis Mai hwn angen bod wedi cofrestru i bleidleisio. Dim ond pum munud y mae’n ei gymryd i wneud cais ar-lein ar gov.uk/cofrestru-i-bleidleisio. Mae pleidleiswyr sy’n dymuno gwneud cais i’w cyngor am ID am ddim angen sicrhau i ddechrau eu bod nhw wedi cofrestru i bleidleisio. Y dyddiad cau ar gyfer cofrestru i bleidleisio yn yr etholiad yw dydd Llun, 16 Ebrill, 2024.