Os bydd eich plentyn yn dechrau ym mlynyddoedd 3 i 6 yn yr ysgol gynradd ym mis Medi, bydd gennych ddiddordeb yn hyn!
Mae plant mewn dosbarthiadau derbyn a blynyddoedd 1 a 2 yng Nghymru eisoes yn cael prydau ysgol am ddim diolch i Raglen Gyffredinol Prydau Ysgol am Ddim Llywodraeth Cymru ac o fis Medi, bydd hyn yn cael ei gyflwyno i bob disgybl ym mlynyddoedd 3 i 6 yn Wrecsam.
Mae hyn yn rhan o ymateb Llywodraeth Cymru i bwysau cynyddol costau byw ar deuluoedd, er mwyn mynd i’r afael â thlodi plant a sicrhau nad oes unrhyw blentyn yn mynd heb fwyd yn yr ysgol.
Peidiwch â methu’r cyfle hwn i gael pryd ysgol poeth, maethlon i’ch plentyn – am ddim!
Ydi eich plentyn eisoes yn cael prydau ysgol am ddim?
Os ydi eich plentyn yn cael Prydau Ysgol am Ddim ar hyn o bryd yn seiliedig ar eich amgylchiadau, efallai y gallwch hefyd hawlio cymorth ychwanegol trwy’r Grant Hanfodion Ysgol, sy’n cynnwys cymorth ariannol ar gyfer gwisg ysgol, offer chwaraeon a dyfeisiau.
Felly, o fis Medi ymlaen rydym yn annog rhieni i barhau i wneud cais am Brydau Ysgol am Ddim fel bod eich plentyn yn cael yr holl gymorth y mae ganddo hawl iddo.
I hawlio’r cynllun eleni, ewch i Grant Hanfodion Ysgol | Cyngor Bwrdeistref Sirol Wrecsam.
Ydi eich sefyllfa ariannol wedi newid dros y flwyddyn ddiwethaf?
Os nad yw eich plentyn yn cael Prydau Ysgol am Ddim ar hyn o bryd, ond bod eich amgylchiadau wedi newid eleni, efallai y gall Wrecsam gynnig cymorth i chi. I wirio a ydych chi’n gymwys am Brydau Ysgol am Ddim, ewch i Prydau Ysgol am Ddim | Cyngor Bwrdeistref Sirol Wrecsam. Os ydych chi’n gymwys, efallai bod modd i chi dderbyn y Grant Hanfodion Ysgol hefyd.
Meddai’r Cyng. Phil Wynn, Aelod Arweiniol Addysg: “Os ydych yn credu eich bod yn gymwys i gael Prydau Ysgol am Ddim, ewch i’n gwefan i wneud cais, hyd yn oed os yw eich plentyn yn gymwys i gael y Prydau Ysgol am Ddim Cyffredinol. Os bydd eich cais yn llwyddiannus, mae’n bosibl y byddwch chi’n gallu cael mynediad at y Grant Hanfodion Ysgol hefyd, sy’n gam pwysig wrth atal arian rhag rhwystro addysg plant. Felly, os ydych yn credu eich bod yn gymwys, cysylltwch â ni i gefnogi rhieni a dysgwyr drwy’r flwyddyn ysgol.”
Ydi eich plentyn yn dechrau ysgol? Byddwch angen cyfrif Parent Pay
Er mwyn i’ch plentyn dderbyn pryd ysgol am ddim – boed yn bryd ysgol am ddim cyffredinol neu un ar sail cymhwyster – byddwch angen cyfrif ar wefan Parent Pay www.parentpay.com. Dyma sut i greu cyfrif:
- Anfonwch e-bost at schoolmeals@wrexham.gov.uk gan nodi enw llawn eich plentyn, ei ddyddiad geni ac enw ei ysgol, a gofynnwch am god gweithredu Parent Pay
- Byddwch yn derbyn cod gweithredu ar gyfer sefydlu eich cyfrif
Os oes gennych chi unrhyw gwestiynau am help ariannol sydd ar gael i’ch plentyn yn ystod ei gyfnod yn yr ysgol, gallwch gysylltu â ni ar freeschoolmeals@wrexham.gov.uk.
Byddwch angen rhag archebu prydau ysgol ar Parent Pay hefyd. Mae hyn wir yn helpu ysgol eich plentyn oherwydd nad oes raid i athrawon golli amser addysgu gwerthfawr yn cymryd archebion. Golyga hefyd fod eich plentyn yn cael ei ddewis cyntaf o bryd o fwyd, ac mae’n ein helpu i leihau gwastraff. Unwaith y byddwch wedi sefydlu cyfrif Parent Pay, gallwch archebu prydau bwyd eich plentyn hyd at bythefnos ymlaen llaw.
Derbyniwch y newyddion a’r wybodaeth ddiweddaraf yn syth i’ch mewnflwch.
