Mae’r Nadolig ar ei ffordd, ac mae digon i edrych ymlaen ato yn Wrecsam yn ystod tymor yr ŵyl, gyda pharcio am ddim, marchnadoedd Nadolig, adloniant a gweithgareddau i’r teulu cyfan.
P’un a ydych chi’n awyddus i fwrw ati efo’ch siopa Nadolig, mwynhau diwrnod allan Nadoligaidd neu fwynhau’r awyrgylch, mae gan ganol dinas Wrecsam rywbeth at ddant pawb.
A gyda pharcio am ddim ar gael ar ddyddiadau penodol trwy gydol cyfnod yr ŵyl, mae’n haws fyth gwneud y gorau o’r hyn sydd gan y ddinas i’w gynnig.
Mwynhewch barcio am ddim dros y Nadolig
Gall trigolion ac ymwelwyr fwynhau parcio am ddim ym mhob un o feysydd parcio’r Cyngor yn ystod cyfnod yr ŵyl, ac eithrio Tŷ Pawb, gan ei gwneud hi’n haws ymweld â chanol y ddinas ar gyfer siopa Nadolig, dathliadau’r ŵyl a diwrnodau allan gyda theulu a ffrindiau.
O 26Tachwedd – 24 Rhagfyr, bydd parcio am ddim ar gael ar yr amseroedd canlynol:
- Dydd Sul – Dydd Iau: 3pm tan hanner nos
- Dydd Gwener a dydd Sadwrn: 9.30am tan hanner nos
P’un a ydych chi’n chwilio am y presant perffaith, yn mwynhau pryd Nadoligaidd neu’n archwilio canol y ddinas, mae’r trefniadau parcio am ddim yn rhoi rheswm arall i ymweld â Wrecsam a chefnogi ei busnesau lleol.
Gall ymwelwyr sy’n gyrru i mewn i Wrecsam hefyd elwa o arwyddion parcio digidol sy’n dangos nifer y lleoedd sydd ar gael mewn meysydd parcio perthnasol.
Mae’r arwyddion yn rhoi gwybodaeth gyfredol am argaeledd parcio i yrwyr, gan eu helpu i benderfynu ble i barcio cyn cyrraedd eu cyrchfan.
Beth sy’n digwydd yn Wrecsam dros y Nadolig?
Mae digon i edrych ymlaen ato wrth i Wrecsam fynd i ysbryd y Nadolig, gyda rhaglen wych o ddigwyddiadau, marchnadoedd a gweithgareddau Nadoligaidd yn cael eu cynnal ledled y ddinas.
O gynnau’r goleuadau Nadolig a marchnadoedd traddodiadol i adloniant teuluol a chyfleoedd i gasglu’r presantau pwysig hynny.
Cefnogwch yn lleol yn ystod tymor yr ŵyl
Mae’r Nadolig yn gyfnod pwysig i fusnesau lleol, ac mae ymweld â Wrecsam yn ffordd wych o ddangos eich cefnogaeth.
O siopau annibynnol a marchnadoedd traddodiadol i gaffis, bwytai a ffefrynnau’r stryd fawr, mae canol y ddinas yn cynnig digon o gyfleoedd i siopa, bwyta a mwynhau amser gyda theulu a ffrindiau.
Manteisiwch i’r eithaf ar Wrecsam
Gyda pharcio am ddim, arwyddion digidol defnyddiol, marchnadoedd Nadolig ac adloniant yr ŵyl, mae digon i’w fwynhau yn Wrecsam dros y Nadolig.
Felly beth am gasglu eich ffrindiau a’ch teulu, mwynhau’r awyrgylch Nadoligaidd a chefnogi’r busnesau gwych sy’n gwneud Wrecsam yn arbennig?
Dywedodd y Cynghorydd Mark Pritchard, Arweinydd Cyngor Wrecsam, “Mae’r Nadolig yn amser gwych i ymweld â Wrecsam, ac rydyn ni am ei gwneud mor hawdd â phosib i drigolion ac ymwelwyr ddod i ganol y ddinas, mwynhau’r dathliadau a chefnogi ein busnesau lleol.
“Trwy gynnig parcio am ddim drwy gydol cyfnod yr ŵyl, rydyn ni’n annog pobl i wneud y gorau o bopeth sydd gan Wrecsam i’w gynnig, o’n siopau a’n bwytai annibynnol i’r marchnadoedd Nadolig ac adloniant.
“Mae hefyd yn bwysig atgoffa pobl y gall deiliaid Bathodyn Glas barcio am ddim ym meysydd parcio’r Cyngor drwy gydol y flwyddyn.
“Rydyn ni eisiau i Wrecsam fod yn ddinas groesawgar a hygyrch i bawb, ac rydw i’n gobeithio y bydd pobl yn manteisio ar y trefniadau hyn ac yn mwynhau popeth sy’n digwydd dros y Nadolig.
“Hoffwn gofnodi fy niolch i Grŵp Annibynnol y Cyngor ac aelodau’r Gynghrair am eu cefnogaeth i wneud i hyn ddigwydd.”
Am fanylion llawn meysydd parcio’r Cyngor, ewch i Dod o hyd i faes parcio.
