Mae WSMR wedi cyflwyno cais newydd i Swyddfa’r Rheilffyrdd a’r Ffyrdd i weithredu gwasanaethau uniongyrchol o Wrecsam i orsaf Llundain Euston o fis Rhagfyr 2026 ymlaen.
Mae’r cais newydd ar gyfer pedwar gwasanaeth rheilffordd uniongyrchol bob ffordd o Wrecsam drwy Amwythig, Telford, Wolverhampton, Walsall, Nuneaton, i Lundain Euston.
Daw’r cais ar ôl i Swyddfa’r Rheilffyrdd a’r Ffyrdd wrthod ym mis Gorffennaf 2025 yn sgil materion ynghylch capasiti a diogelwch croesfannau troed, er bod y materion diogelwch a oedd yn weddill bellach wedi’u tynnu’n ôl.
Mae’r cais newydd yn adeiladu ar y capasiti presennol a rhyddhau llwybrau trên Avanti West Coast.
Dywedodd y Cynghorydd David A Bithell, Dirprwy Arweinydd Cyngor Wrecsam, a’r Aelod Arweiniol dros Drafnidiaeth Strategol: “Mae Cyngor Wrecsam wedi parhau i gefnogi gwelliannau i wasanaethau rheilffyrdd ac mae hyn bellach yn flaenoriaeth i wella cysylltiadau â Chanolbarth Lloegr a Llundain Euston.
“Yn dilyn trafodaethau cadarnhaol gyda WSMR, rydym yn cefnogi eu cais newydd yn llawn. Mae’r buddsoddiad yn Wrecsam fel lle, a llwyddiant Clwb Pêl-droed Wrecsam, yn darparu cyfleoedd gwirioneddol i greu cysylltiadau trafnidiaeth pwysig i gefnogi dyheadau’r ddinas. Mae’r Adran Drafnidiaeth wedi cefnogi’r cais yn y gorffennol.”
Ychwanegodd y Cynghorydd Bithell: “Bydd y Cyngor yn lobïo ein holl Aelodau Seneddol ac Aelodau o’r Senedd, ac yn cyfarfod WSMR yr wythnos nesaf i sicrhau’r gwasanaethau hanfodol hyn.
“Mae Wrecsam yn ddinas ffyniannus sy’n tyfu ac mae gwasanaethau rheilffyrdd newydd nid yn unig yn creu swyddi a thwf, ond yn cefnogi gwell cysylltedd â chanolbarth Lloegr a Llundain Euston.”
Dywedodd y Cynghorydd Mark Pritchard, Arweinydd y Cyngor: “Mae hwn yn gyfnod cyffrous i Wrecsam fel dinas, ac mae gwasanaethau rheilffordd uniongyrchol i Lundain Euston nid yn unig yn darparu gwell gwasanaethau rheilffyrdd, ond cyfleoedd buddsoddi i Wrecsam a’r rhanbarth ehangach.”
