Eleni eto, bydd miloedd o drigolion lleol dalgylch yr Eisteddfod Genedlaethol sydd ar incwm isel yn gallu ymweld â’r Brifwyl yn rhad ac am ddim, diolch i grant o £200,000 gan Lywodraeth Cymru.
Mae’r grant hwn yn cynnwys mynediad am ddim i’r teulu cyfan, ynghyd â thaleb bwyd i blant. Bwriad y pecyn yw sicrhau fod trigolion lleol na fyddai’n ystyried ymweld â’r Eisteddfod fel arall yn gallu manteisio ar y cyfle i ymweld â’r ŵyl a gynhelir yn ardal Is-y-coed ar gyrion Wrecsam o 2-9 Awst eleni.
Meddai Ysgrifennydd Cabinet Llywodraeth Cymru dros Gyllid a’r Gymraeg, Mark Drakeford, “Rwy’n falch ein bod ni’n rhoi cefnogaeth i sicrhau bod fwy o deuluoedd yn gallu mwynhau’r Eisteddfod.
“Mae’r Eisteddfod yn rhan bwysig iawn o’n calendr diwylliannol ac yn rhoi’r cyfle i bobl weld, clywed a siarad Cymraeg beth bynnag yw eu cefndir. Mae’r Gymraeg yn perthyn i ni gyd ac mae’r grant yma am alluogi mwy o deuluoedd i fynychu’r ŵyl.”
Ychwanegodd Betsan Moses, Prif Weithredwr yr Eisteddfod Genedlaethol, “Rydyn ni’n ddiolchgar iawn i Lywodraeth Cymru am eu cefnogaeth unwaith eto eleni, er mwyn sicrhau fod teuluoedd lleol ar incwm isel yn gallu cael blas ar ein hiaith a’n diwylliant yn yr Eisteddfod.
“Mae’r cynnig yn cynnwys talebau bwyd i blant yn ogystal â thocyn Maes, ac rydyn ni’n credu fod cynnig mwy na thocyn yn hollbwysig er mwyn sicrhau bod ein gŵyl yn hygyrch i bawb sy’n dymuno dod draw i’r Maes. Rydyn ni’n edrych ymlaen at groesawu pawb i ardal Is-y-coed ymhen y mis.”
Mae’r cynllun eleni’n cael ei weinyddu gan Gyngor Bwrdeistref Sirol Wrecsam ar ran yr Eisteddfod, ac mae’r cyngor yn y broses o gysylltu â phawb sy’n gymwys i wneud cais am docyn Maes am ddim ar hyn o bryd.
Dywedodd y Cynghorydd Hugh Jones, Aelod Arweiniol dros Gynllunio Strategol, Diogelu’r Cyhoedd a Phencampwr y Gymraeg yng Nghyngor Wrecsam: “Wrth i ni edrych ymlaen at groesawu ymwelwyr i’r Eisteddfod yn Wrecsam, rydyn ni’n awyddus iawn i sicrhau y bydd cynifer o’n trigolion ni â phosibl yn cae cyfle i ymweld a phrofi a dathlu ein hiaith a’n diwylliant.
“Rydym yn falch iawn o’r cyfle i weithio gyda’r trefnwyr i ddarparu’r cyfle yma i deuluoedd na fyddai wedi ystyried ymweld â’r ŵyl fel arall, diolch i gefnogaeth hael y Llywodraeth. Rydw i’n annog pawb sy’n gymwys i dderbyn tocynnau i wneud cais a manteisio i’r eithaf ar ymweliad yr Eisteddfod.”
Cynhelir Eisteddfod Genedlaethol Wrecsam o 2-9 Awst. Am ragor o wybodaeth, ewch i eisteddfod.cymru
