Llofnodwch a rhannwch y ddeiseb gan gefnogi gwasanaethau rheilffyrdd newydd ar gyfer Wrecsam.
Ar ddydd Llun 2 Mawrth, teithiodd gwasanaeth siarter o Wrecsam Cyffredinol i Lundain Euston mewn ymgais i ailsefydlu cysylltiad rheilffordd uniongyrchol rhwng y ddwy ddinas.
Roedd nifer sylweddol ac amrywiaeth y rhanddeiliaid yn dangos cryfder ac uchelgeisiau a rennir y busnesau, y sefydliadau a’r cymunedau a fyddai’n elwa o’r ddarpariaeth hon, a allai ddarparu hyd at 4 taith yn ôl rhwng Wrecsam ac Euston bob dydd.
Aeth dros 120 o randdeiliaid a phartïon â diddordeb ar y daith ar y trên i Lundain gyda’r bwriad o dynnu sylw at bwysigrwydd gwell cysylltedd rheilffyrdd rhwng Canolbarth Lloegr, Llundain a Wrecsam.
Cododd y trên amrywiol randdeiliaid a phwysigion ar hyd y ffordd, a hefyd mynd heibio lleoliadau gorsafoedd newydd posib ar y rheilffordd. Nid yw llawer o’r arosfannau’n cael eu gwasanaethu gan wasanaeth trên uniongyrchol i Lundain ar hyn o bryd.
Yna, aeth y cynrychiolwyr ar fysus i San Steffan, taith gerdded fer i ffwrdd o Downing Street, lle tynnwyd lluniau y tu allan i’r gatiau i hyrwyddo’r cynnig, a gwahoddwyd cynrychiolaeth fach i’r tu mewn i’r giât i gyflwyno’r cynnig i ddrws rhif 10.
Dywedodd yr Aelod Arweiniol dros Drafnidiaeth Strategol, y Cynghorydd David A Bithell: “Mae cysylltiadau rheilffordd dibynadwy, uniongyrchol yn hanfodol i gryfhau ein heconomi ranbarthol, gan ddenu buddsoddiad, a chreu cyfleoedd newydd i fusnesau lleol.
“Mae’r gwasanaeth rheilffordd newydd arfaethedig hwn yn gyfle sylweddol ar gyfer gwell cysylltedd rhwng Wrecsam, Canolbarth Lloegr a Llundain, a hynny heb unrhyw gost i’r trethdalwr.
Dywedodd y Cynghorydd Mark Pritchard, Arweinydd y Cyngor: “Mae hwn yn gynnig sy’n cael ei yrru’n fasnachol sy’n darparu gwerth economaidd mesuradwy wrth gryfhau cystadleurwydd hirdymor ein rhanbarth.
“Mae ein cyfarfodydd gyda WSMR wedi bod yn gadarnhaol iawn ac rydym yn gweithio’n agos gyda’r holl randdeiliaid i droi’r cynnig cyffrous hwn yn realiti i Wrecsam.
“Os cawn sêl bendith, disgwylir i’r llinell newydd ddarparu gwerth £9 miliwn o fuddion economaidd rhwng Wrecsam, Amwythig a Walsall heb unrhyw gost i’r trethdalwr.”
Dywedodd yr Aelod Arweiniol dros yr Economi ac Adfywio, y Cynghorydd Nigel Williams: “Cafodd y gwasanaeth uniongyrchol olaf o Wrecsam i Lundain ei atal yn 2011.
“Ers hynny, ac yn enwedig yn ystod y blynyddoedd diwethaf, mae Wrecsam wedi newid yn ddramatig o ran proffil fel cyrchfan ar gyfer twristiaeth yn ogystal â lle gwych i wneud busnes.
“Bydd cyflwyno’r gwasanaeth hwn yn gwella’r profiad teithio, ac yn gwneud mynediad i Wrecsam ar y trên o Ganolbarth Lloegr a Llundain yn opsiwn cyflymach a mwy dymunol.”
Llofnodwch a rhannwch y ddeiseb gan gefnogi gwasanaethau rheilffyrdd newydd ar gyfer Wrecsam.
