Bydd Sian Hughes, awdur y nofel Pearl a gyrhaeddodd y rhestr hir ar gyfer Gwobr Booker, yn cymryd rhan mewn digwyddiad lansio arbennig ar gyfer Gŵyl Geiriau Wrecsam 2024.
Mae’r nofel wedi’i lleoli dros y ffin yn Tilston yn Swydd Gaer a disgrifiwyd y nofel gan feirniaid Booker fel “nofel gyntaf arbennig, sy’n stori ddirgel ac yn fyfyrdod ar alar, gadael a chysur”. Mae’n adrodd hanes Marianne, merch 8 oed, pan mae ei mam yn mynd ar goll. Ar ôl cael ei gadael ar ôl gyda’i brawd bach a thad sy’n galaru, mewn hen dŷ ar gyrion pentref bach, mae’n gwneud ei gorau i ddal ei gafael yn yr atgofion tameidiog o gariad ei mam.
Wrth i Marianne dyfu i fyny, mae’n cael trafferth addasu nes iddi gael cysur o ddarllen hen gerdd, Pearl, ond a fydd y gerdd hon o gymorth i’w gwella ac a fydd ei dyfodol hithau fel mam yn ei galluogi hi i ddod o hyd i heddwch? Bydd Sian Hughes yn siarad am ei nofel gyda phodlediwr Bookylicious, Paul Jeorrett yn Llyfrgell Wrecsam ddydd Mercher, 27 Mawrth am 7.00pm.
Bydd y digwyddiad lansio hefyd yn cynnwys cyhoeddi enillydd y gystadleuaeth Dirgelwch Llofruddiaeth 2024. Bydd y sgript fuddugol yn cael ei pherfformio yn ystod yr wythnos.
- Cofrestru -
Bydd y cyhoeddiad yn cael ei wneud gan Faer Wrecsam ar y cyd â’r nofelydd trosedd Prydeinig hynod lwyddiannus, Simon McCleave. Bu i’w lyfr cyntaf, ‘The Snowdonia Killings’ gyrraedd rhif 1 yn Siart Amazon y DU ac mae ei nofelau dilynol yng Nghyfres Nofelau Trosedd Cyffrous DI Ruth Hunter wedi bod ymysg y gwerthwyr gorau ar Amazon ac mae llawer wedi cyrraedd brig Siart Digidol y DU.
Mae wedi gwerthu dros 2 filiwn o lyfrau ers 2020. Yr unfed nofel ar bymtheg yn y gyfres yw The Wrexham Killings. Mae llyfrau o gyfres Ruth Hunter wrthi’n cael eu datblygu i gyfres deledu.
Mae Gŵyl Geiriau Wrecsam yn ŵyl lenyddiaeth flynyddol sy’n cael ei chynnal rhwng 20-27 Ebrill 2024. Mae’r rhaglen lawn bellach wedi cael ei chyhoeddi ar www.wrexhamcarnivalofwords.com ac mae Joanne Harris, Catherine Isaac, Simon McCleave a Katy Watson, Suzan Holder, Mike Parker, Elen Caldecott a Vaseem Khan ymysg yr awduron sy’n cymryd rhan. Gallwch archebu tocynnau ar gyfer bob digwyddiad ar-lein neu eu cael o Lyfrgell Wrecsam.
Mae’r Tocyn Gŵyl arbennig ar gael am bris gostyngedig tan ddiwedd mis Mawrth.
