Beth yw mannau agored?
Diffinnir mannau agored fel unrhyw fan awyr agored sydd yn cael ei ystyried i fod â gwerth cyhoeddus. Gall yr holl fannau hyn ddarparu cyfleoedd iechyd, lles a hamdden i bobl sydd yn byw gerllaw, yn ogystal â darparu gwerth ecolegol i amrywiaeth o rywogaethau. Gall y term mannau agored gynnwys rhywbeth mor fach â llain ymyl ffordd, i ardal mor fawr â pharc gwledig.
Pwy sy’n rheoli’r mannau agored yn Wrecsam?
Mae’r mannau agored ar draws Bwrdeistref Sirol Wrecsam yn cael eu llywodraethu gan sawl darn o ddeddfwriaeth, ac un o’r rhannau mwyaf pwysig ynddynt yw rhwymedigaeth Cyngor Bwrdeistref Sirol Wrecsam i wella’r amgylchedd naturiol.
Daw hyn o dan Ddeddf Llesiant Cenedlaethau’r Dyfodol (Cymru) 2015 a Deddf yr Amgylchedd (Cymru) 2016. Mae’r Ddeddf gyntaf yn canolbwyntio ar wella lles cymdeithasol, economaidd, amgylcheddol a diwylliannol Cymru, ac mae’r ail Ddeddf yn canolbwyntio ar sicrhau ecosystemau iach, gwydn a chynhyrchiol.
Ein Gweledigaeth
Mae Bwrdeistref Sirol Wrecsam yn le gydag ystod amrywiol o fannau agored sy’n hygyrch ac yn cael eu rheoli’n briodol (yn ôl eu defnydd bwriadol) er mwyn sicrhau eu bod yn lân, yn ddiogel, yn addas i’r diben ac yn darparu’r cyfleoedd gorau ar gyfer effeithiau amgylcheddol cadarnhaol. Mae gennym ni sawl amcan, a phan fyddwn ni wedi’u cyflawni, bydd yn golygu manteision amgylcheddol, cymdeithasol ac economaidd.
Dweud eich dweud
Mae pawb yn elwa o fod â mynediad at fannau agored ar draws y Sir, felly mae hi’n bwysig eich bod yn dweud eich dweud am sut mae ein mannau agored yn cael eu rheoli a’u gweithredu, ac i roi adborth am y modd y maent yn cael eu rhedeg ar hyn o bryd. Gallwch ddweud eich dweud drwy fynd i wefan ‘Eich Llais’ a llenwi’r arolwg. Ni ddylai gymryd mwy na 10 munud i chi ei lenwi.
Dywedodd y Cynghorydd Hugh Jones, Aelod Arweiniol yr Amgylchedd: “Mae ein mannau agored a sut rydym yn eu defnyddio yn rhan bwysig o’n cymunedau, yn ystod y blynyddoedd diwethaf mae ein barn ar sut y dylent edrych a chael eu defnyddio wedi newid ac mae’n bwysig ein bod yn cael dealltwriaeth gyfoes o’r hyn rydych chi’n ei ystyried yn bwysig a sut yr hoffech iddynt gael eu defnyddio. “Gwnewch eich barn yn hysbys drwy ymateb i’n harolwg sy’n rhedeg rhwng Gorffennaf 21ain a Medi 1af.”
