Gallai cynllun peilot wneud teithio i’r ysgol yn fwy diogel ac yn haws i blant mewn pentref yn Wrecsam.
Bydd Cyngor Wrecsam, mewn partneriaeth â Sustrans Cymru a Letman Associates, yn lansio treial tair wythnos yn Ysgol Gynradd Gymunedol Holt yn ddiweddarach y mis hwn.
Bydd y treial yn gweld cyfyngiadau traffig yn cael eu cyflwyno i gyfyngu ar nifer y cerbydau all gyrru a pharcio ger yr ysgol ar ddechrau ac ar ddiwedd y diwrnod ysgol.
Dyma’r cynllun ‘Strydoedd Ysgol’ cyntaf yn Wrecsam, ac mae’n cael ei ariannu gan gronfa Llwybrau Diogel mewn Cymunedau Llywodraeth Cymru.
Dywedodd y Cynghorydd Huw Jones, Aelod Arweiniol Cyngor Wrecsam â chyfrifoldeb dros ddiogelwch ar y ffyrdd: “Dros y misoedd diwethaf, rydyn ni wedi bod yn gwrando ar ddisgyblion, rhieni a phreswylwyr am sut y gallwn ni wella’r daith i’r ysgol.
“Mae’r prif bryderon yn cynnwys goryrru, croesfannau annigonol i gerddwyr, palmentydd cul, gwelededd gwael ar gyffyrdd, a pharcio anystyriol.
“Mae’r ysgol eisoes yn gweithio’n galed i leihau traffig wrth y gatiau trwy annog cerdded, a defnyddio sgwteri a beiciau – felly dyma’r lle perffaith i dreialu’r cynllun Strydoedd Ysgol.”
Ychwanegodd y Cynghorydd Phil Wynn, yr Aelod Arweiniol dros addysg: “Rydyn ni eisiau gwneud gatiau’r ysgol yn lle mwy diogel ac iach i blant, ac os yw’r cynllun peilot yn llwyddiant, gallai baratoi’r ffordd ar gyfer treialon tebyg mewn ysgolion cynradd eraill yn Wrecsam.
“Dros yr ychydig flynyddoedd diwethaf, mae Strydoedd Ysgol wedi cael eu cyflwyno mewn rhannau eraill o’r DU gyda chryn lwyddiant.
“Dim ond yn ystod adegau allweddol o’r dydd y daw cyfyngiadau traffig i rym, felly mae unrhyw aflonyddwch ar fodurwyr yn cael ei leihau, ac mae’r plant yn fwy diogel.”
Nid yw union ddyddiadau’r treial yn Holt wedi’u cadarnhau eto, ond bydd Gorchymyn Rheoleiddio Traffig Arbrofol yn cael ei gyhoeddi, ac mae trigolion, rhieni a disgyblion lleol yn cael y newyddion diweddaraf am y cynllun.
