Dros y blynyddoedd diwethaf, mae pwyntiau gwefru cerbydau trydan wedi cael eu gosod ledled y fwrdeistref sirol ac mae’r gwaith yn parhau i ddarparu mwy.
Mae Cyngor Wrecsam wedi bod yn gweithio gyda Costelloes, gyda chyllid rhannol gan Lywodraeth Cymru, i gynyddu’r rhwydwaith o bwyntiau gwefru dibynadwy ac o ansawdd uchel, sy’n cynnwys rhai gwefrwyr chwim iawn
Wrth i ni symud tuag at y gwaharddiad ar werthu cerbydau newydd sy’n cael eu pweru gan injan hylosgiad mewnol yn 2030 a cherbydau Hybrid yn 2035, mae’n gynyddol bwysig sicrhau bod gennym rwydwaith cryf o wefrwyr sydd ar gael i’r cyhoedd.
Dywedodd y Cynghorydd David A Bithell, yr aelod arweiniol dros newid yn yr hinsawdd: “Mae Cyngor Wrecsam eisiau sicrhau bod y seilwaith ar waith i gefnogi pobl gyda’r newid i gerbydau trydan, yn enwedig y rhai nad ydynt yn gallu parcio oddi ar y ffordd, fel y gall pawb deimlo’n fwy hyderus wrth wneud y penderfyniad i newid.”
Ble maen nhw?
Mae map sy’n nodi’r holl wefrwyr sydd ar gael yn Wrecsam (a gweddill y DU i’r rhai ohonoch sy’n teithio) i’w weld ar y wefan neu ap zapmap – hidlwch i Clenergy EV ar gyfer pwyntiau gwefru a ddarperir gan Gyngor Wrecsam. Os nad ydych chi’n siŵr, chwiliwch am logo Cyngor Wrecsam ar y gwefrydd.
Gostyngiad i breswylwyr Wrecsam
Oeddech chi’n gwybod bod preswylwyr Wrecsam yn gallu cael gostyngiad ar fannau gwefru yn ein meysydd parcio ac ar y stryd lle mae logo Cyngor Wrecsam yn cael ei arddangos?
Gallwch ddarllen mwy am y gostyngiad, a gwneud cais amdano, drwy wefan Grŵp Costelloes EV.
Dim gwefrydd yn agos atoch chi?
Os ydych chi’n teimlo y byddai eich ardal leol neu eich stryd chi yn elwa o wefrydd cerbydau trydan cyhoeddus, rhowch wybod i ni drwy e-bostio decarbonisation@wrexham.gov.uk a byddwn yn asesu eich cais i weld a yw’n addas.
