Ydych chi’n gwybod bod caffi gwych yn yr Hwb Lles ar Stryt Caer yn Wrecsam?
Caiff Caffi Cyfle ei redeg gan Groundwork North Wales ac mae’n darparu amrywiaeth o ddanteithion iach a melys ar gyfer coffi’r bore, cinio cyflym neu frecinio hamddenol, er mwyn codi gwên i’ch wyneb.
Ac os bydd plant gyda chi, mae ardal chwarae meddal wych fydd wrth eu boddau nhw.
Dyma’r oriau agor
- Dydd Llun i Ddydd Iau: 10:00 am – 3:00 pm
- Dydd Gwener: 10:00 am – 2:00 pm
Mae’r caffi wedi ennill sgôr hylendid bwyd “5” gan yr Asiantaeth Safonau Bwyd – y lefel uchaf bosibl.
Caffi Cyfle “mae’r awyrgylch yn gymdeithasol iawn”
Dywedodd y Cynghorydd John Pritchard, Aelod Arweiniol Gofal Cymdeithasol i Oedolion, “Mae Caffi Cyfle yn rhywbeth i’w groesawu i’r cyfleusterau a gynigir yng nghanol y dref ac mae’r staff yn mynd allan o’u ffordd i ddarparu danteithion iach a melys i bawb eu mwynhau.
“Mae’r awyrgylch yn gymdeithasol iawn a gallwch fod yn ffyddiog y bydd eich plant yn cael amser gwych yn yr ardal chwarae.
“Felly beth am alw heibio y tro nesaf fyddwch chi yn y dref, a dysgu beth yw’r Hwb Lles a sut mae’n helpu pobl o bob oed i ganfod y gwasanaethau sydd eu hangen arnynt.”
Beth yw’r Hwb Lles?
Mae’r Hwb Lles wedi ei greu drwy bartneriaeth yn cynnwys Cyngor Bwrdeistref Sirol Wrecsam, Cymdeithas Mudiadau Gwirfoddol Wrecsam a Bwrdd Iechyd Prifysgol Betsi Cadwaladr.
Caiff gwasanaethau/sesiynau eu rhedeg gan dimau gofal cymdeithasol, yn ogystal â darparwyr iechyd, grwpiau cymunedol a sefydliadau trydydd sector (gan gynnwys elusennau a grwpiau nid-er-elw).
Yma maent yn gallu darparu eu gwasanaethau mewn amgylchedd diogel er mwyn:
- gwella mynediad at wybodaeth, cyngor a chefnogaeth
- darparu datrysiadau ataliol ac amgen i ofal a chefnogaeth (gan ymdrin ag iechyd corfforol, iechyd meddwl a lles)
Ers iddo agor yn 2022, mae pobl o bob oed o bob rhan o’r fwrdeistref sirol wedi ymweld â’r Hwb Lles, sy’n canolbwyntio ar iechyd corfforol, yn ogystal ag iechyd meddwl a lles, mewn amgylchedd diogel.
Mae mannau newid clytiau, cyfleusterau toiled a mynediad at gynnyrch mislif am ddim hefyd, felly gallwch helpu eich hunain i’r hyn sydd ei angen arnoch.
Gallwch ddarllen mwy am yr Hwb Lles yma
Efallai yr hoffech hefyd ddarllen Tŷ Pawb i gynnal arddangosfa deithiol arloesol
