Mae Cyngor Wrecsam yn gofyn i bobl leol helpu i lunio dyfodol gofal cymdeithasol i oedolion dros y blynyddoedd nesaf.
Mae’r cyngor yn gofyn i drigolion rannu eu barn ar:
- Sut y gall weithio gyda phobl leol i lunio gwasanaethau.
- Sut y gall helpu pobl i gadw’n iach wrth iddynt fynd yn hŷn.
- Sut i gefnogi pobl sy’n byw gyda dementia, a’u gofalwyr, yn well.
- Sut i helpu pobl i ofalu am eu lles meddyliol.
- Sut i gefnogi gofalwyr di-dâl orau.
Bydd y canlyniadau yn llywio nifer o gynlluniau strategol lefel uchel.
Mae’n bwysig ein bod yn ei wneud yn iawn
Mae miloedd o unigolion a theuluoedd ledled Wrecsam yn derbyn cymorth gan wasanaethau cymdeithasol – gan gynnwys pobl sy’n byw gydag anableddau, dementia a phroblemau symudedd, yn ogystal â gofalwyr di-dâl (pobl sy’n gofalu am berthynas neu ffrind).
Mae’r cyngor yn aml yn trefnu pecynnau gofal cartref, therapi galwedigaethol, gofal dydd, gofal seibiant a chymorth arall.
Dywedodd y Cynghorydd John Pritchard, Aelod Arweiniol dros Ofal Cymdeithasol i Oedolion: “Mae gofal cymdeithasol yn cyffwrdd â chymaint o fywydau, mewn cymaint o wahanol ffyrdd.
“Mae’n bwysig felly ein bod yn ei wneud yn iawn dros y blynyddoedd nesaf, a’n bod yn cefnogi pobl yn y ffordd iawn.
Os oes 10 munud sbâr gennych, cymerwch ran yn ein harolwg a rhannwch eich barn gyda ni.
“Rydyn ni’n awyddus i glywed gan gynifer o bobl â phosibl, ond yn enwedig gan bobl sy’n defnyddio ein gwasanaethau neu’n gweithredu fel gofalwr i berthynas neu ffrind.”
Mae’r arolwg yn cau ar 30 Mehefin. Cymerwch ran nawr a helpwch i lunio’r dyfodol.
