Mae Cyllid a Thollau EF (CThEF) yn dyrannu £5.5 miliwn i sefydliadau yn y sector gwirfoddol a chymunedol er mwyn iddynt roi cymorth i gwsmeriaid y gallai fod angen help ychwanegol arnynt gyda’u materion treth.
Mae CThEF yn gwahodd sefydliadau cymwys i wneud cais am y cyllid, sy’n werth £1.8m y flwyddyn o 2024 tan 2027, drwy gynllun Cyllid Grant y Sector Gwirfoddol a Chymunedol (VCS) CThEF. Gellir cyflwyno ceisiadau rhwng 24 Gorffennaf a 21 Awst 2023. Bydd y sefydliadau llwyddiannus yn cael eu cyhoeddi ym mis Hydref, i’w paratoi ar gyfer y cyllid newydd a fydd yn dechrau o 1 Ebrill 2024 ymlaen.
Dyma’r 12fed rownd o gyllid y mae CThEF yn ei ddyrannu fel rhan o’i ymrwymiad i helpu pawb i gael eu treth yn gywir. Mae’r cynllun yn parhau â mwy na degawd o gyllid partneriaeth, sy’n werth dros £20m.
Meddai Angela MacDonald, Dirprwy Brif Weithredwr ac Ail Ysgrifennydd Parhaol CThEF:
- Cofrestru -
“Rydyn ni’n gwybod bod cwsmeriaid wir yn gwerthfawrogi’r cyngor treth dibynadwy y maen nhw’n ei gael gan ein partneriaid yn y sector gwirfoddol a chymunedol. Mae’r cynllun cyllid yn rhan bwysig o’n hymrwymiad i roi cymorth i’r cwsmeriaid hynny y mae’n anodd eu cyrraedd, ac mae’n datblygu’r cymorth presennol y mae CThEF yn ei gynnig i’r rhai y mae angen help ychwanegol arnynt gyda’u materion treth.”
“Mae RNIB yn hynod ddiolchgar i CThEF”
Meddai David Newbold, Cyfarwyddwr Gwasanaeth Cyngor ar Golli Golwg, o RNIB, sef un o 12 sefydliad sydd wedi cael arian cyn hyn drwy’r cynllun cyllid grant, “Mae RNIB yn hynod ddiolchgar i CThEF am ei gymorth hael, sy’n helpu i sicrhau bod pobl ddall a rhannol ddall yn gallu cael mynediad at y cyngor, y wybodaeth a’r help ymarferol sydd eu hangen arnynt i ddelio â’u materion treth a CThEF. Rydym yn falch o gael CThEF fel partner, ac mae ei gyfraniad yn hanfodol wrth i ni barhau â’n gwaith pwysig o roi cymorth i unigolion sy’n agored i niwed.”
Yn ystod y flwyddyn ddiwethaf yn unig, mae sefydliadau sydd wedi cael arian drwy’r cynllun cyllid grant wedi rhoi cymorth i 39,000 o gwsmeriaid dros y ffôn, gyda chyfarfodydd wyneb yn wyneb, a thrwy e-bost.
Bydd sefydliadau llwyddiannus yn cael arian i roi cyngor a chymorth – yn rhad ac am ddim – i gwsmeriaid sydd:
- yn wynebu rhwystrau o ran deall eu hymrwymiadau treth ac wrth hawlio’r hyn y mae ganddynt hawl iddo
- yn cael eu heithrio rhag cael mynediad at wasanaethau CThEF drwy ddull digidol
- yn cael unrhyw anhawster arall wrth ryngweithio’n uniongyrchol â CThEF.
Yn ogystal â rhoi cymorth i gwsmeriaid y gallai fod angen help ychwanegol arnynt, bydd sefydliadau’n rhannu safbwyntiau gwerthfawr sy’n helpu CThEF i ddeall profiad cwsmeriaid sy’n agored i niwed. Bydd hyn yn galluogi CThEF i gwtogi ar y rhwystrau, a gwella profiad cwsmeriaid wrth iddynt ddelio â’r adran.
I’r sawl sy’n ei chael hi’n anodd cysylltu â CThEF oherwydd cyflyrau iechyd neu eu hamgylchiadau personol, bydd Cynllun Cyllid Grant y Sector Gwirfoddol a Chymunedol yn ategu gwaith Tîm Cymorth Ychwanegol CThEF sydd wrth law i helpu ein cwsmeriaid.
Mae rhagor o wybodaeth am gymhwystra a sut i wneud cais ar gael ar-lein yn GOV.UK.
Mae’n bosibl yr hoffech ddarllen hefyd am Nifer syfrdanol o 27,844 o gwsmeriaid credydau treth yn adnewyddu drwy ap CThEF
