Unwaith eto mae’n rhaid i ni atgoffa rhieni a gofalwyr i fod yn ymwybodol o reolau’r ffordd fawr wrth ollwng a chasglu eu plant o’r ysgol er mwyn osgoi dirwy gan un o’n swyddogion gorfodi neu swyddogion yr heddlu sy’n cerdded heibio’r ysgolion yn rheolaidd.
Mae hyn yn dilyn damwain a fu bron â digwydd ger ysgol leol oherwydd parcio anystyriol ac anghyfreithlon.
Meddai’r Cynghorydd Mark Pritchard, Arweinydd y Cyngor, gyda chyfrifoldeb am orfodi parcio, “Mae parcio yn ystod amseroedd gollwng a chasglu yn broblem mewn sawl ardal ac rwy’n gwybod y bydd swyddogion yn cymryd camau gorfodi pan fyddant yn gweld rhywun yn parcio’n anghyfrifol. Y tu allan i ysgolion mae llinellau igam-ogam amlwg a llinellau melyn dwbl yn aml – mae’n anghyfreithlon parcio ar y rhain a gallai gwneud hynny, am bum munud hyd yn oed, arwain at ddirwy gan y Cyngor neu’r Heddlu, ond yn waeth na hynny fe allech beryglu bywyd plentyn a does neb eisiau bod yn gyfrifol am hynny. Parciwch yn gyfreithlon”.
- Cofrestru -
Meddai’r Aelod Arweiniol dros yr Amgylchedd, gyda chyfrifoldeb am ddiogelwch ar y ffordd, y Cynghorydd Hugh Jones, “Mae parcio mewn ardaloedd dan gyfyngiadau ar unrhyw adeg yn anystyriol ac anghyfreithlon ond mae hefyd yn anghyfrifol a pheryglus. Maent yno i sicrhau y gall plant groesi’n ddiogel. Mae parcio ar balmentydd a rhwystro mynediad i breswylwyr yn hunanol ac anghyfrifol a byddwn yn cymryd camau priodol yn erbyn unrhyw droseddwyr.”
“Mae’n rhaid i rieni a gofalwyr sicrhau eu bod yn parcio eu ceir yn gyfreithlon bob amser ac os yw’n anodd dod o hyd i le parcio, dylid parcio ymhellach i ffwrdd.”
Dywedodd yr Arolygydd Luke Hughes: “Mae parcio’n anghyfrifol y tu allan i ysgolion yn ei gwneud yn anodd gweld plant wrth iddynt groesi’r ffordd, gan olygu bod mwy o siawns y byddant yn cael eu niweidio.
“Ar rai achlysuron mae’n ofynnol bod pobl yn parcio mor agos at yr ysgol â phosibl, er enghraifft os oes ganddynt broblemau symudedd. Ond mae nifer, os nad y mwyafrif, yn ddiog ac yn blaenoriaethu eu cyfleustra eu hunain dros les y plant.
“Parciwch yn ystyriol a rhowch y gorau i fod yn hunanol.”
Wedi methu casgliad bin? Rhowch wybod i ni ar-lein – mae’n hawdd.
RHOWCH WYBOD AM GASGLIAD BIN A FETHWYD
