Os ydych chi’n defnyddio cyfleuster parcio a theithio Ffordd Rhuthun ar gyfer gemau cartref Clwb Pêl-droed Wrecsam, rydych ar fin gweld rhywbeth ychydig yn wahanol…
Pan fydd y bws parcio a theithio nesaf yn cyrraedd Ffordd Rhuthun, mi fydd ar ei newydd wedd.

Dywedodd y Cynghorydd David A Bithell, yr aelod arweiniol dros yr amgylchedd: “Mae’r bws parcio a theithio newydd yn edrych yn wych a hoffwn ddiolch i dîm dylunio mewnol y cyngor am greu rhywbeth sy’n gwneud i’r bws sefyll allan ar ddiwrnodau gêm, tra hefyd yn hyrwyddo’r gwasanaeth hwn i breswylwyr ledled y fwrdeistref sirol wrth iddo wneud ei waith arferol yn ystod yr wythnos.
“Bydd y galw am barcio yng nghanol y ddinas ond yn cynyddu wrth agor y safle newydd felly mae’r defnydd cynyddol o’r cyfleuster parcio a theithio, ynghyd â phrisiau rhatach Arriva ar ddiwrnodau gêm, yn gam pwysig i’r cyfeiriad cywir.”
Mae’r cyfleuster parcio a theithio wedi parhau i gael ei ddefnyddio’n dda ar gyfer pob gêm gartref Clwb Pêl-droed Wrecsam, ac ers iddo ddechrau mae wedi cludo 3,047 o deithwyr.
Cyflwynwyd y cyfleuster parcio a theithio i ddarparu parcio ychwanegol ar ddiwrnod gêm, gan leddfu’r pwysau ar feysydd parcio canol y ddinas ac yn y pen draw lleihau parcio anghyfreithlon a diystyriol yng nghanol y ddinas a’r strydoedd cyfagos.
Yn ogystal â hyn, mae hefyd yn chwarae rhan yn amcan y cyngor i leihau llygredd ac allyriadau carbon, sy’n nod llawer mwy y mae’r cyngor yn gweithio’n galed tuag ato. Mae cynyddu argaeledd a defnydd o drafnidiaeth gyhoeddus yn gyffredinol – nid yn unig ar ddiwrnod gêm – yn chwarae rhan fawr yn hyn, a dyna pam mae’r cyngor wedi buddsoddi £650,000 yn y rhwydwaith trafnidiaeth gyhoeddus yn ystod y 12 mis diwethaf, sy’n golygu bod 232,000 o deithiau ychwanegol wedi’u gwneud yn y cyfnod hwnnw.
Ychwanegodd y Cynghorydd David A Bithell “Mae’r cyngor wedi ymrwymo i leihau allyriadau carbon ar draws y fwrdeistref sirol ac mae gan wella mynediad at drafnidiaeth gyhoeddus rôl bwysig i’w chwarae yn hyn o beth. Dyma pam rydyn ni wedi gwneud buddsoddiad o’r fath, sydd eisoes yn talu ar ei ganfed o ran nifer y teithwyr rydyn ni’n eu gweld.”


