Mae’r Maer Beryl Blackmore, ynghyd â Chynghorwyr eraill, a Swyddogion y Cyngor, a Chadeirydd a Phrif Swyddog Gweithredol Groundwork Gogledd Cymru and Refurbs wedi lansio’r prosiect newydd ‘Benthyca a Thrwsio’ yn swyddogol; cyn croesawu ymwelwyr o ddydd Iau, 1 Mai.
Gyda chymorth trwy gyllid Ffyniant Gyffredin Llywodraeth y DU, mae Cyngor Wrecsam yn gweithio gyda Benthyg Cymru, Caffi Trwsio Cymru, Lend Engine, Refurbs a Groundwork Gogledd Cymru i ddarparu’r prosiect.
Beth yw ‘Llyfrgell Pethau’?
Mae’r prosiect yn seiliedig ar y cysyniad ‘Llyfrgell Pethau’, sy’n golygu y gallwch fenthyca eitemau defnyddiol am gost fach (o’i gymharu â’r hyn y byddech chi’n ei dalu i brynu’r eitem yn newydd eich hun).
Mae yna lawer o offer / cyfarpar y mae pobl yn eu gweld yn ddefnyddiol bob hyn a hyn – ond nid yw talu’r gost lawn i’w prynu eich hun yn gwneud synnwyr os yw’n mynd i fod yn segur y rhan fwyaf o’r amser!
Mathau o eitemau
Bydd amrywiaeth o eitemau ar gael, gan gynnwys:
- Offer gwaith y cartref ac offer garddio
- Offer glanhau
- Offer gwersylla
- Gemau parti
Gallwch edrych ar eitemau’r catalog yn lendandmend.org.uk
Dywedodd y Cynghorydd Terry Evans, Aelod Arweiniol y Gwasanaethau Amgylcheddol: “Bydd y prosiect yn fenter wych i’r gymuned; gan ganiatáu i breswylwyr rentu eitemau am gost isel tra hefyd yn cyfrannu at economi fwy cynaliadwy”.
Oes gennych chi eitemau y gallech eu rhoi?
Os oes gennych unrhyw eitemau nad oes eu hangen arnoch mwyach, cysylltwch â ni drwy e-bostio info@lendandmend.org.uk i weld a ellid eu hychwanegu at y casgliad.
Gallai hyn fod yn offer neu gyfarpar sy’n ddefnyddiol o amgylch y tŷ neu’r ardd, ar gyfer heicio, neu’n wych ar gyfer adloniant.
Casglu / gollwng
Mae dau locer mawr (yn debyg i loceri casglu parseli) sy’n gallu dal eitemau o wahanol feintiau, un yn yr uned Benthyca a Thrwsio ei hun ac un yn y coridor ger yr uned.
Mae hyn yn golygu y byddwch chi’n gallu gollwng eitemau rydych chi wedi gorffen gyda nhw unrhyw bryd yn ystod oriau agor prif adeilad Tŷ Pawb os yw’r uned ar gau.
Bydd yr uned yn cael ei gosod i agor:
- Dydd Mawrth – Dydd Gwener, 11.30am – 2.30pm
- Dydd Sadwrn: 10.30am – 3.30pm
- Ar gau ar ddydd Sul a dydd Llun
Mwy na llyfrgell fenthyca yn unig
Yn ogystal ag eitemau i’w benthyca, nod y prosiect yw darparu sesiynau trwsio a gweithdai ymarferol bob mis – i helpu i ddangos i bobl sut i drwsio neu uwchgylchu eitemau presennol.
Mae hyn yn helpu’r ‘economi gylchol’ lle mae eitemau’n cael eu cadw mewn defnydd am gyfnod hwy, sy’n golygu bod llai o adnoddau’n cael eu defnyddio i greu eitemau newydd pan mae eitem yn gallu cael ei thrwsio yn lle hynny.
Dywedodd Karen Balmer, Prif Swyddog Gweithredol Groundwork Gogledd Cymru “Mae gennym obeithion mawr y bydd y cyfleuster newydd hwn yn dda i bobl, yr economi a’r amgylchedd.
“Rydym yn edrych ymlaen at groesawu ein hymwelwyr cyntaf ar 1 Mai”.
Y diweddaraf
Gallwch gadw llygad am ddiweddariadau prosiect ar Dudalen Facebook Benthyca a Trwsio (neu cysylltwch â ni drwy info@lendandmend.org.uk).
Efallai yr hoffech hefyd ddarllen: Menter gymunedol newydd Benthyca a Thrwsio yn dod i Tŷ Pawb, Wrecsam, yn fuan
