Rydym yn falch o gymryd rhan yn yr Wythnos Pontio’r Cenedlaethau Byd-eang am yr eildro! Mae Wythnos Pontio’r Cenedlaethau yn ymwneud â dod â phobl o bob oed ynghyd i rannu straeon, dysgu pethau newydd a chael amser gwych. Ond, wrth gwrs, nid yw’r gwaith yn gorffen ar ôl i’r wythnos ddod i ben.
Mae’r wythnos arbennig hon yn gyfle gwych i fyfyrio ar yr holl fentrau pontio’r cenedlaethau gwych yn Wrecsam, megis sefydlu grŵp plant bach pontio’r cenedlaethau, ysgolion cynradd yn ymweld â chartrefi preswyl, a myfyrwyr yn Ysgol Gynradd Gymunedol Victoria yn cymryd rhan mewn digwyddiad atal cwympiadau.
Mae’r wythnos hon yn llawn gweithgareddau dyddiol sy’n helpu pobl o wahanol genedlaethau i gysylltu â’i gilydd. P’un a ydych chi’n ifanc neu’n hŷn, neu rywle yn y canol, mae rhywbeth i bawb ei fwynhau a’i ddysgu gan eraill.
Cymerwch gip ar yr hyn sy’n digwydd bob dydd ar ein tudalennau cyfryngau cymdeithasol. Cofiwch, mae pob tamaid yn helpu i ddod â’n cymuned yn agosach, gan wneud yr wythnos hon yn llwyddiant. Gadewch i ni fwynhau dysgu oddi wrth ein gilydd.
Dywedodd y Cynghorydd John Pritchard, Aelod Arweiniol dros Ofal Cymdeithasol i Oedolion: “Rwy’n falch o gefnogi Wythnos Pontio’r Cenedlaethau. Mae gwaith pontio’r cenedlaethau yn dathlu’r cysylltiadau a’r doethineb a rennir rhwng cenedlaethau. Mae’r wythnos hon yn ein hatgoffa o bwysigrwydd y perthnasoedd hyn a sut y gallwn ni ddysgu oddi wrth ein gilydd.”
Dywedodd y Cynghorydd Robert Walsh, Aelod Arweiniol dros Wasanaethau Plant: “Mae Wythnos Pontio’r Cenedlaethau yn ffordd wych o gydnabod y cysylltiadau buddiol o’r ddwy ochr sy’n bodoli rhwng cenedlaethau iau a chenedlaethau hŷn. Y rhodd fwyaf y gallwn ei derbyn gan y rheini sy’n iau na ni ac sy’n hŷn na ni yw gwybodaeth, dealltwriaeth a pharch o’r ddwy ochr. Mae ein bywydau yn cael eu cyfoethogi trwy bobl hŷn sydd â phrofiadau nad ydym, neu nad ydym eto, wedi eu hwynebu. Hefyd, rydym yn cael ein cyfoethogi gan y rheini sy’n iau na ni gan y gallwn ddysgu oddi wrthynt hefyd. Efallai ein bod wedi bod yn ifanc ein hunain ond mae profiadau’n esblygu dros amser fel y gallwn bob amser ddysgu rhywbeth newydd gan y rheini sy’n iau na ni. Rwy’n cefnogi diben a nodau Wythnos Pontio’r Cenedlaethau ac yn dymuno pob llwyddiant iddi.”
Os ydych am gael rhagor o wybodaeth, neu os ydych am drafod unrhyw syniadau yn ymwneud â phontio’r cenedlaethau, e-bostiwch Vicki Lindley-Jones yn commissioning@wrexham.gov.uk
Derbyniwch y newyddion a’r wybodaeth ddiweddaraf yn syth i’ch mewnflwch.
