Ar ddydd Mawrth 15 Ebrill atafaelodd Swyddogion Safonau Masnach, o adran Diogelu’r Cyhoedd Cyngor Wrecsam, gynnyrch o ddau safle yn Wrecsam yn rhan o’r ymgyrch barhaus i darfu ar y farchnad tybaco a fêps anghyfreithlon leol. Atafaelwyd cynnyrch anghyfreithlon o’r ddau leoliad ac mae ymchwiliadau’n parhau.
Gwta 2 ddiwrnod yn ddiweddarach caniataodd llys ynadon Wrecsam ddau gais am orchmynion cau ar gyfer adeiladau manwerthu cyfagos ym Mhentre’r-ardd Cafodd Chester Road Mini Market a Best Cuts Barber orchymyn i gau ar unwaith am dri mis ar ôl i dystiolaeth gael ei chyflwyno i’r llys ynglŷn â meddu ar dybaco a fêps anghyfreithlon, a’u cyflenwi i eraill.
Dywedodd y Cynghorydd Hugh Jones, yr Aelod Arweiniol dros Ddiogelu’r Cyhoedd, “Mae’r nifer fawr o siopau fêps sydd wedi agor yn y ddinas yn frawychus ac mae dod o hyd i gynnyrch anghyfreithlon ar safle barbwr yr un mor bryderus. Byddwn yn parhau i roi pwysau ar y fasnach anghyfreithlon hon am ei bod hi’n bygwth iechyd plant ac oedolion ac yn dod â throsedd i’n cymuned. Byddwn yn annog unrhyw un sy’n pryderu, yn enwedig am iechyd plant ac sydd ag unrhyw wybodaeth am gyflenwi’r cynhyrchion anghyfreithlon hyn i roi gwybod amdano ar-lein yn noifs-nobutts.co.uk/ neu dros y ffôn ar 029 2049 0621
“Mae dros 5000 o bobl yng Nghymru yn marw bob blwyddyn o glefydau sy’n gysylltiedig ag ysmygu, ac mae’n lladd 1 o bob 2 o defnyddiwr hirdymor. Mae mynediad hawdd at dybaco rhad yn cynyddu’r siawns y bydd plant yn datblygu caethiwed gydol oes i’r cynnyrch hynod gaethiwus hwn. Mae fêps anghyfreithlon yn cynnwys llawer mwy o nicotin na’r lefelau a ganiateir ac yn peri risg debyg o gaethiwed gydol oes. Mae fêps tafladwy yn cael effaith fawr ar yr amgylchedd gyda miliynau’n cael eu taflu bob blwyddyn yng Nghymru. Mae pob fêp sy’n cael ei daflu yn cynnwys plastig, cydrannau electronig, batri a hylif gweddilliol. Dyw’r rhan fwyaf ohonynt ddim yn cael eu hailgylchu ac mae’r batris yn achosi tanau mewn cyfleusterau ailgylchu gwastraff.” Oherwydd hyn byddwn yn ceisio tarfu cymaint â phosibl ar y fasnach hon drwy bob dull posib.
*Gellir rhannu gwybodaeth yn ddienw – ar-lein yn noifs-nobutts.co.uk/ neu dros y ffôn ar 029 2049 0621
