Mae Cyngor Wrecsam wedi prynu Maes Parcio Sant Marc i’w ailddatblygu.
Mae’r adeilad ychydig oddi ar Stryt y Rhaglaw, ger Y Werddon, ac roedd yn faes parcio aml-lawr preifat nes iddo gau yn 2020.
Nod y Cyngor yw ailddatblygu’r safle i greu gwell mynediad i’r cyhoedd rhwng Y Werddon, Stryt y Rhaglaw a Stryt y Brenin, ac i ddarparu cyfleuster ar gyfer bysus sy’n ymweld – gan helpu i gefnogi diwydiant twristiaeth sy’n tyfu yn y ddinas.
Bydd yr ailddatblygiad yn cefnogi Amgueddfa Wrecsam gerllaw pan fydd yn ailagor yn ddiweddarach eleni, yn ogystal ag Amgueddfa Bêl-droed Cymru newydd – y rhagwelir y bydd yn denu hyd at 80,000 o ymwelwyr bob blwyddyn.
Rhannwyd y prosiect yn dri cham – caffael (wedi’i gwblhau), archwilio opsiynau, ac yna dymchwel ac ailddatblygu’r safle.
Dywedodd y Cynghorydd Nigel Williams, yr Aelod Arweiniol dros yr Economi, Busnes a Thwristiaeth: “Dros y blynyddoedd diwethaf, cafwyd rhai prosiectau adfywio mawr yn y ddinas, gan gynnwys Cynllun Treftadaeth Treflun y Stryt Fawr, adnewyddu marchnadoedd dan do Wrecsam, a’r Hen Lyfrgell yn Sgwâr y Frenhines yn cael ei defnyddio unwaith eto.
“Bydd prynu a datblygu safle Sant Marc yn datblygu ein huchelgeisiau cynyddol fel dinas ymhellach.”
Dywedodd y Cynghorydd Paul Roberts, yr Aelod Arweiniol dros Bartneriaethau: “Gydag Amgueddfa Wrecsam a’r Amgueddfa Bêl-droed gerllaw yn agor eu drysau yr haf hwn, mae hwn yn gaffaeliad gwych a fydd o fudd i bobl leol ac ymwelwyr – gan greu gwell mynediad i’r rhan hon o’r ddinas.
“Rydym hefyd yn gobeithio y bydd yr ailddatblygu yn lleihau ymddygiad gwrthgymdeithasol a pharcio anawdurdodedig yn yr ardal – dau fater sydd wedi bod yn bryder ers i’r maes parcio gau ychydig flynyddoedd yn ôl.
“Mae hwn yn brosiect cyffrous iawn i Wrecsam.”
