Gyda’r brif swyddfa yn Wrecsam, mae Marlin Industries Ltd wedi gweithredu fel cwmni cyfyngedig preifat am 32 mlynedd. Gan dyfu o gwmni newydd yn 1991, mae gan y cwmni bellach 175 o bobl ar draws chwe safle yn y DU gyda refeniw blynyddol o thua £17 miliwn.
Un o brif swyddogaethau’r busnes yw darparu riliau a drymiau ar gyfer cebl neu raff. Defnyddir y riliau a drymiau i gludo cebl neu raff o’r ffatri i’r safle gosod.
Wedi ei wneud o goed, pren haenog neu wastraff cebl wedi ei ailgylchu, gellir defnyddio nifer o’r riliau a’r drymiau fwy nag unwaith.
Mae Marlin Industries yn fusnes Sero i Dirlenwi yn canolbwyntio ar gynaliadwyedd
Yn ddiweddar, bu i’r Aelod Arweiniol Economi ac Adfywio, y Cyng. Nigel Williams ymweld â’u safle a gweld sut mae eu gwaith yn helpu i amddiffyn yr amgylchedd.
- Cofrestru -
Defnyddiant eu fflyd eu hunain o gerbydau a darparu gwasanaeth ledled y DU, gan gasglu riliau a drymiau o safleoedd ble mae cebl wedi ei osod. Yna mae’r rhain yn cael eu hadnewyddu, eu hatgyweirio neu osod cydrannau newydd er mwyn eu hailddefnyddio.
Mae ailddefnyddio deunydd pecynnu fel hyn yn gostwng costau, ond yn bwysig yn gostwng gwastraff ac yn golygu bod angen llawer llai o riliau a drymiau.
Mae hyn yn ganolog i ethos Marlin ac yn creu cynnig unigryw a chyflawn i ddiwydiannau ynni a thelegyfathrebu.
I gyd-fynd â’r atebion pecynnu newydd a adnewyddwyd, mae system ailgylchu fewnol yn golygu y gellir prosesu pren a phlastig i gynnyrch eraill; nid oes unrhyw ddeunydd yn mynd i safle tirlenwi, mae bob dim yn cael ei ailgylchu.
Mae ailddefnyddio deunydd pecynnu a ddefnyddir ar draws y diwydiant ceblau yn enghraifft dda o’r economi gylchol ar waith. Mae’r cwmni hwn yn awyddus i ddatblygu hyn trwy ymestyn ei alluoedd ymhellach ac mae nawr yn targedu dyddiad o 2030 i ddod yn sefydliad di-garbon.
Dywedodd y Cynghorydd Williams, “Mae eu gweithrediad yn hynod drawiadol ac mae eu sylw i’r amgylchedd o’r radd flaenaf.
“Hoffwn ddiolch i John a Mel am gymryd yr amser i fy nhywys o amgylch y safle a fy niweddaru o ran eu cynlluniau ar gyfer y dyfodol.”
Dywedodd John Droog, Prif Weithredwr Marlin Industries, “Fel arweinwyr y farchnad yn y chwyldro gweithgynhyrchu carbon isel o fewn y diwydiant ceblau roedd yn bleser tywys Nigel o amgylch y safle.
“Bu i ni ddangos iddo ein bod ni, fel busnes economi gylchol, yn darparu atebion i’n cwsmeriaid sy’n gostwng costau ac yn gwella perfformiad amgylcheddol.”
Ewch i’w gwefan.
Efallai yr hoffech chi hefyd ddarllen Llwyddiant Brecwast Busnes Cynghrair Mersi a’r Ddyfrdwy yn Net World Sports
Derbyniwch y newyddion a’r wybodaeth ddiweddaraf yn syth i’ch mewnflwch
