Erthygl Gwadd – Refurbs
Diolch i arian o Gronfa Ffyniant Gyffredin Llywodraeth y DU, mae Refurbs a Chyngor Bwrdeistref Sirol Wrecsam yn falch o gyhoeddi y bydd Benthyca a Thrwsio yn dod i Tŷ Pawb yn fuan ……
Bydd Benthyca a Thrwsio, y fenter gyntaf o’i bath yng ngogledd Cymru, yn cael ei lansio yng nghanol Wrecsam, gyda’r nod o helpu pobl leol i gael gafael ar eitemau bob dydd mewn ffordd fwy hwylus a chynaliadwy. Trwy ymweld â Benthyca a Thrwsio gall pobl fenthyca teclynnau, offer, ac offer chwaraeon am dâl bach—gan arbed arian, lleihau gwastraff, a threuliant diangen.
Bydd sesiynau trwsio rheolaidd yn cael eu trefnu, lle gall pobl ddod ag eitemau o’r cartref sydd wedi torri er mwyn iddynt gael eu trwsio am ddim, yn ogystal â dysgu am y gwaith trwsio gan wirfoddolwyr medrus. Bydd cyfle i fod yn greadigol hefyd yn y gweithdai uwchgylchu a fydd yn dangos sut i drawsnewid hen ddefnyddiau yn eitemau newydd a defnyddiol.
- Cofrestru -
Nid arbed arian yn unig yw pwrpas y fenter hon—mae hefyd yn ceisio dod â phobl at ei gilydd. Bydd sesiynau a gweithdai trwsio yn dod ag unigolion ynghyd, a’u hannog i rannu sgiliau gan feithrin teimlad cryfach o gymuned. Yn hytrach na phrynu teclynnau neu offer newydd sydd ddim yn cael eu defnyddio am y rhan fwyaf o’r flwyddyn, bydd yn bosibl i bobl fenthyca eitemau pan mae eu hangen arnynt. Yn hytrach na chael gwared ar eitemau, bydd cyfle i ddysgu sut i’w trwsio a’u hailddefnyddio, gan ymestyn oes eitemau bob dydd a lleihau’r gwastraff sy’n cael ei anfon i safleoedd tirlenwi.
Nod Benthyca a Thrwsio yw helpu pobl i wneud newidiadau gwirioneddol fydd yn eu helpu i arbed arian ac o fudd i’r blaned. Trwy leihau’r galw am nwyddau newydd, mae’r fenter yn lleihau allyriadau CO₂ a’r defnydd o ddefnyddiau crai, gan gael effaith wirioneddol ar gadwraeth amgylcheddol.
“Mae Benthyca a Thrwsio yn fwy na gwasanaeth benthyca—mae’n gyfle i ddysgu a rhannu. Mae’n rhaid i bob newid ddechrau’n lleol, ac rydym yma i helpu i roi’r adnoddau a’r sgiliau mae eu hangen ar bobl i fyw’n fwy cynaliadwy,” dywedodd Stewart Platt, Pennaeth Gwasanaethau Masnachol Refurbs ar ran Benthyca a Thrwsio
Mae amserlen lawn o sesiynau a gweithdai trwsio, a chyfleoedd benthyca eisoes wedi’u trefnu, ac mae Benthyca a Thrwsio yn edrych ymlaen i ddod yn ganolbwynt bywiog ar gyfer byw’n fwy cynaliadwy. Mae pobl leol yn cael eu hannog i gymryd rhan drwy wirfoddoli, benthyca eitemau, a dysgu sgiliau newydd.
Mae Benthyca a Thrwsio yn ganlyniad ymdrech gydweithredol rhwng Cyngor Bwrdeistref Sirol Wrecsam, Benthyg Cymru, Caffi Trwsio Cymru, Lend Engine, Groundwork Gogledd Cymru a Refurbs, a gwirfoddolwyr cymunedol.
I gael rhagor o wybodaeth am Benthyca a Thrwsio, neu i wirfoddoli, cysylltwch â: info@lendandmend.org.uk neu dewch o hyd iddynt ar Facebook @LendandMendTyPawb.
