Wrth i’r flwyddyn ysgol ddod i ben, a fydd gennych chi wisg ysgol nad oes ei hangen ar eich plentyn mwyach?
P’un a yw wedi gorffen yn ei ysgol bresennol neu wedi tyfu’n rhy fawr iddi, ond mae’n dal i fod mewn cyflwr da, rydyn ni’n gofyn i chi ei rhoi.
Oes gennych chi wisg i’w rhoi?
Mae dwy ffordd i roi gwisg:
- Os yw ysgol eich plentyn yn cymryd rhan, gallwch chi ei gadael yno cyn diwedd tymor yr haf
- Os nad yw’r ysgol yn cymryd rhan neu os yw yn ystod gwyliau’r ysgol, gallwch chi fynd â hi i’r Hwb Lles, Adeiladau’r Goron, Wrecsam (mynedfa wrth ymyl maes parcio’r ganolfan Byd Dŵr)
Pa eitemau y gellir eu rhoi?
Mae angen amrywiaeth o wisgoedd o ysgolion ar draws y fwrdeistref sirol, gan gynnwys:
- Eitemau â logo (blaseri, siwmperi, cardiganau, crysau chwys, gwisgoedd addysg gorfforol)*
- Trowsusau (llwyd neu ddu)
- Sgertiau (llwyd neu ddu)
- Pinafforau (cynradd)
*Mae eitemau â logo, yn enwedig y rhai ar gyfer ysgolion uwchradd, yn arbennig o bwysig felly os oes gennych chi unrhyw un o’r rhain nad oes eu hangen arnoch chi mwyach, bydden ni’n gwerthfawrogi eich rhodd yn fawr.
Ar fin prynu gwisg ysgol? Arhoswch funud…
Bydd eitemau sydd wedi’u rhoi ar gael i bawb yn y fwrdeistref sirol tan fydd y stoc yn dod i ben.
Nid oes angen apwyntiad arnoch chi ac nid oes angen gwaith papur. Dewch i’r dderbynfa yn yr Hwb Lles a bydd staff wrth law i helpu i ddod o hyd i’r eitemau sydd eu hangen arnoch chi.
Bydd yr holl eitemau am ddim, bydd stoc yn cael ei hychwanegu ati wrth i roddion ddod i law, a bydd yr holl eitemau yn cael eu gwirio i sicrhau eu bod nhw’n lân ac mewn cyflwr da.
Dywedodd y Cynghorydd David A Bithell, yr aelod arweiniol dros yr amgylchedd: “Bob blwyddyn yn y DU, mae tua 300,000 tunnell o ddillad yn mynd i mewn i finiau cartrefi, ac yna’n cael eu llosgi neu eu hanfon i safleoedd tirlenwi. Nid yw’r un o’r ddau beth hynny’n ecogyfeillgar nac yn gynaliadwy. Mae’r prosiect hwn yn gyfle perffaith i leihau gwastraff dillad yn Wrecsam. Os oes gennych chi wisg ysgol y mae eich plentyn wedi tyfu’n rhy fawr iddi, dw i’n eich annog chi i’w gadael yn ei ysgol neu, ar ôl 20 Gorffennaf, yn yr Hwb Lles.”
Dywedodd y Cynghorydd John Pritchard, yr hyrwyddwr trechu tlodi: “Rydyn ni i gyd yn ymwybodol o’r cynnydd yng nghostau byw, felly mae hwn yn gyfle i’w groesawu i bob teulu yn Wrecsam i dorri cost gwisg ysgol. Mae’r holl eitemau dillad yn yr Hwb Lles am ddim, mewn cyflwr da ac yn lân, a dw i’n gobeithio y bydd cymaint o bobl â phosibl yn dod draw dros wyliau’r haf i gasglu’r hyn y bydd eu plant ei angen ar gyfer y flwyddyn ysgol nesaf.”
