Mae gan Openreach broblemau yn ardaloedd cod post LL11, LL12, LL13 ac LL14, sydd yn effeithio ar ffonau, Wi-Fi a rhyngrwyd yn benodol.
Fe allai’r broblem effeithio ar bobl ddiamddiffyn ar draws y fwrdeistref, ac fe allai effeithio ar dechnoleg teleofal a chynorthwyol pobl. Os oes gennych chi aelodau teulu, cymdogion neu gyfeillion diamddiffyn, byddai’n syniad i chi wirio eu bod nhw’n iawn rhag ofn bod ganddynt unrhyw broblemau.
Dywedodd llefarydd ar ran Openreach: “Yr ydym yn siomedig iawn o orfod eich hysbysu bod ein seilwaith sy’n gwasanaethu eiddo yn ardal Southsea a Choedpoeth, Wrecsam, wedi ei dargedu gan droseddwyr unwaith eto.
“Mae ein peirianwyr wedi bod yn gweithio’n galed i atgyweirio’r seilwaith sydd wedi ei ddifrodi. Y mae tua 5km o gebl copr tanddaearol wedi ei ddwyn ar wahanol achlysuron.
- Cofrestru -
“Rydym yn gweithio’n agos gyda’r heddlu, ac rydym wedi gosod mesurau diogelwch uwch yn yr ardal.
“Yn amlwg, mae dwyn cebl yn fater sy’n cael effaith arwyddocaol ar y gymuned ehangach, a byddem yn annog y cyhoedd i fod yn wyliadwrus a rhoi gwybod i’r heddlu am unrhyw weithgaredd amheus maent yn ei weld gerllaw ein seilwaith.”
