Rhowch eich bin du allan ar eich diwrnod casglu arferol…
Ar ôl pythefnos o streicio gan Unite, disgwylir i aelodau’r undeb llafur ddychwelyd i’r gwaith ddydd Llun, 18 Medi.
Gyda’r lefelau staffio yn ôl i’r lefelau arferol am y tro, mae Cyngor Wrecsam yn gobeithio gwneud iawn ac yn cyhoeddi neges syml i aelwydydd lleol…
- Rhowch eich biniau du a’ch cynwysyddion ailgylchu allan ar eich diwrnod casglu arferol (hyd yn oed os nad hon yw’ch wythnos biniau du arferol), gan ein bod ni’n bwriadu gwagio’r holl finiau du a chynwysyddion ailgylchu (yn cynnwys gwastraff bwyd) yn ystod yr wythnos sy’n dechrau ar 18 Medi.
- Peidiwch â rhoi eich biniau gwyrdd allan, yn anffodus ni fyddwn yn gallu casglu gwastraff gardd.
Mae’r streic wedi effeithio ar gasgliadau bin ar draws y fwrdeistref, gyda chriwiau gwastraff yn brin iawn o staff a cherbydau methu gadael y depo ar brydiau oherwydd nifer y protestwyr.
Er mai saib dros dro yn y streicio yw’r wythnos nesaf, gyda streic arall am dair wythnos ar 25 Medi, bydd yn gyfle i’r criwiau casglu sbwriel ddal i fyny.
Bydd ein Canolfannau Ailgylchu Gwastraff y Cartref hefyd ar agor (gydag oriau agor bob safle yn cael eu hymestyn tan 8pm), ac rydym ni wedi gweld cynnydd sylweddol yn y gwastraff sy’n cael ei gludo i’r safleoedd hyn yn ystod yr wythnos ddwy ddiwethaf.
Diolch i bawb sydd wedi bod yn gwneud hyn, a gofynnwn i chi barhau i wneud hynny os fedrwch chi gan ei fod yn gadael llai o wastraff ac ailgylchu i ni ei gasglu.
Meddai’r Cyng. Hugh Jones, Aelod Arweiniol yr Amgylchedd, Cyngor Wrecsam: “Byddwn yn defnyddio’r wythnos nesaf i flaenoriaethu casgliadau biniau du a chynwysyddion ailgylchu, ac er na allwn sicrhau y byddwn yn cyrraedd at bawb rydym ni’n hyderus y byddwn yn gwagio’r rhan fwyaf o finiau.
“Yn anffodus, oherwydd ein bod ni’n blaenoriaethu biniau du, does gennym ni ddim digon o staff i gasglu gwastraff gardd hefyd, ac rydym ni’n sylweddoli y bydd rhai pobl yn teimlo’n rhwystredig ynghylch hynny. Fodd bynnag, mae’n rhaid i ni ganolbwyntio ar finiau du ac ailgylchu gan mai’r rhain fydd yn achosi’r rhan fwyaf o bryderon.
“Rydym ni’n gweithio’n galed i reoli gwasanaethau dan amgylchiadau anodd, a hoffem atgoffa pobl o’n hawgrymiadau lleihau a rheoli gwastraff a diolch i bawb am fod mor amyneddgar”.
Bydd y streic nesaf yn cael ei chynnal o 25 Medi tan 15 Hydref, a bydd y Cyngor yn cyhoeddi cyngor pellach i aelwydydd yr wythnos nesaf.
