Fe fydd Parc Acton yn cynnal ei sioe gŵn gyntaf erioed gyda gwobrau, stondinau, crefftau, arddangosfeydd a mwy, ddydd Sul 11 Chwefror, rhwng 11.30am a 4pm. Er mwyn dathlu’r ffaith bod y goeden gastanwydden bêr, sydd bron yn 500 oed, wedi mynd drwodd i rownd nesaf cystadleuaeth Coeden y Flwyddyn a gynhelir gan Goed Cadw, mae trigolion lleol yn cael eu hannog i ddod draw i fwynhau diwrnod i’r teulu cyfan.
11 Categori Gwahanol
- Y ci mwyaf deniadol
- Yr ast ddeliaf
- Y ci achub gorau
- Y gynffon fwyaf siglog
- Y croesfrid gorau
- Yr hen gi gorau (7 mlwydd+)
- Y clustiau mwyaf / gorau
- Y ci mwyaf sgryfflyd
- Y ci a’r perchennog tebycaf i’w gilydd
- Y ci bach deliaf (6-12 mis)
- Y ci sy’n ôl y bêl orau
Y pris yw £1 fesul categori neu 4 categori am £3! (Arian parod yn unig).
Bydd yr elw’n mynd tuag at Almost Home Dog Rescue, elusen leol sydd wedi rhoi cartref i 1241 o gŵn hyd yn hyn!
Gellir cofrestru ar gyfer y categorïau am 11.30am a gallwch barhau i gofrestru trwy gydol y diwrnod. Fe fydd y beirniadu’n cychwyn am 12.15pm ac fe fydd amserlen y categorïau’n cael ei hysbysebu ar y diwrnod ac yn y rhaglen.
Mae yna rosedi a gwobrau i’w hennill, a bydd coeden yn cael ei phlannu yn y parc er anrhydedd enillydd gwobr ‘y gorau yn y sioe’. Fe fydd yn hwyl cymryd rhan neu wylio, rydym ni’n gobeithio gweld llawer o berchnogion anifeiliaid brwdfrydig neu blant iau yn arddangos eu ffrind gorau yng nghylch y sioe! Cofiwch ddarganfod pwy sy’n ennill gwobr ‘y gorau yn y sioe’ am 3.45pm!
- Yn ogystal â gwylio llawer o gŵn hardd yng nghylch y sioe, fe fydd yna arddangosfeydd i ddiddanu’r hen a’r ifanc
- Ufudd-dod am 1pm, mwynhewch wylio’r cŵn ufudd yn arddangos eu gwaith traed taclus
- Gwaith arogl am 2pm, rhyfeddwch sut y gall trwynau pwerus cŵn arogli aroglau sydd wedi’u cuddio
- Triciau am 3pm, cewch eich diddanu gan driciau hwyliog a chael cyfle i ddysgu rhai newydd ar y diwrnod!
Ar y diwrnod fe fydd yna amrywiaeth o stondinwyr, yn cynnwys milfeddygon lleol, steilwyr cŵn, elusennau, gemau, danteithion i gŵn a ffotograffydd anifeiliaid, bydd ffotograffydd sydd wedi ennill gwobrau yn tynnu llun eich anifail, yn ogystal â faniau bwyd a lluniaeth os byddwch chi’n llwglyd.
Er mwyn sicrhau bod pawb yn cael hwyl, gofynnir bod pob ci yn cael ei gadw ar dennyn drwy’r amser, mae’n rhaid i gŵn sy’n cofrestru fod dros 6 mis oed, mae penderfyniad y beirniad yn derfynol a chofiwch mai sioe er hwyl yw hon, nid oes yna bwyntiau cystadleuaeth.
Fe fydd yna fagiau baw cŵn am ddim ar gael ar y diwrnod felly cofiwch glirio baw eich ci. Mae’r digwyddiad am ddim ac mae yna weithgareddau crefftau ar gael, ond cofiwch fod angen arian er mwyn cystadlu yn rhai o’r dosbarthiadau cŵn, crwydro’r stondinau a chael paned!
Edrychwn ymlaen at eich gweld chi a’ch ci hyfryd ar y diwrnod a chofiwch bleidleisio dros yr hen goeden gastanwydden bêr!
Mae rhagor o fanylion ar gael ar dudalen digwyddiadau Cyngor Cymuned Acton ar Facebook: https://fb.me/e/1JRtAEd4l
Efallai yr hoffech chi hefyd ddarllen Cariad at Goed – Digwyddiad Dydd y Cariadon Arbennig ym Mharc Acton
Derbyniwch y newyddion a’r wybodaeth ddiweddaraf yn syth i’ch mewnflwch
