Mae Cyngor Wrecsam yn falch o allu cyhoeddi bod y prosiect i adeiladu safle newydd ar gyfer Ysgol Gynradd y Santes Fair ym Mrymbo wedi cymryd cam mawr ymlaen.
Yn hydref 2024, cytunodd bwrdd gweithredol Cyngor Wrecsam i gynyddu’r nifer derbyn ar gyfer Ysgol Gynradd y Santes Fair ym Mrymbo, gyda’r bwriad o adeiladu ysgol newydd.
Nawr, yn dilyn proses dendro swyddogol, mae’r contractwr llwyddiannus, ???, yn ei le.
Mae cyllid gan Lywodraeth Cymru bellach wedi’i gymeradwyo, ynghyd â chyllid gan Sefydliad Addysg Blwyfol Wrecsam, felly rydym mewn sefyllfa i ddechrau’r gwaith, yn amodol ar gynllunio.
Bydd y gwaith adeiladu yn cymryd tua dwy flynedd o’r adeg y rhoddir caniatâd cynllunio.
Dywedodd Andrew Williams, pennaeth Ysgol Gynradd y Santes Fair, Brymbo: “Rydym yn falch iawn o weld cynnydd tuag at ddatblygu safle newydd i Ysgol y Santes Fair ym Mrymbo. Mae hwn yn gam pwysig tuag at ddarparu cyfleusterau modern o ansawdd uchel i’n disgyblion a’r gymuned ehangach. Edrychwn ymlaen at weithio’n agos gyda Chyngor Wrecsam a’r contractwr penodedig wrth i’r cynlluniau symud ymlaen.”
Dywedodd y Cynghorydd Paul Rogers, aelod lleol dros Frymbo: “Mae penodi contractwr i ddylunio ac adeiladu ysgol newydd i Frymbo yn garreg filltir enfawr yn y prosiect hwn. Ar ôl gweithio gyda swyddogion y Cyngor ar hyn ers peth amser, rwy’n falch bod cynnydd sylweddol wedi’i wneud. Er bod ffordd bell i fynd o hyd, rwy’n edrych ymlaen at weld plant lleol yn cael eu haddysgu mewn ysgol fodern sy’n addas at y diben.”
Dywedodd y Cynghorydd Gary Brown, aelod lleol dros Frymbo: “Mae cael contractwr yn ei le yn newyddion gwych gan fod Cyngor Wrecsam nawr yn gallu gweithio gyda nhw, yn ogystal â rhanddeiliaid lleol a’r gymuned, i ddylunio’r ysgol newydd. Bydd trigolion hefyd yn gallu rhannu eu barn gyda ni ar ôl i’r cais cynllunio gael ei gyflwyno.”
