Mae gwaith ar gynllun teithio llesol yng nghanol dinas Wrecsam wedi’i ohirio er mwyn caniatáu mwy o amser i benodi contractwr.
Roedd disgwyl i’r gwaith ffordd ddechrau ar 5 Ionawr (2026), ond mae’r contractwr a ddyfarnwyd y gwaith iddo’n wreiddiol wedi tynnu ei gais yn ôl.
O ganlyniad, bydd angen i Gyngor Wrecsam ymgymryd â phroses gaffael newydd.
Bydd y cynllun yn arwain at adeiladu llwybr cerdded a beicio gwell rhwng yr ardal i gerddedwyr yng nghanol y ddinas yn Stryt yr Hôb, ger Waterstones, a gorsaf reilffordd Wrecsam Cyffredinol.
Dywedodd y Cynghorydd Terry Evans, Aelod Arweiniol yr Amgylchedd: “Roedd y gwaith i fod i ddechrau fis nesaf yn wreiddiol, ond nawr bydd angen i ni gynnal ymarfer caffael newydd i ddod o hyd i gontractwr.
“Mae’n anodd dweud faint o amser y bydd hyn yn ei gymryd, ond unwaith y byddwn wedi penodi contractwr, dylem gael darlun cliriach o bryd y gall y gwaith ddechrau.”
Roedd y cynllun yn wreiddiol yn rhan o ymgynghoriad cyhoeddus yn 2023. Ers hynny, mae newidiadau wedi eu gwneud yn dilyn adborth gan y cyhoedd yn ogystal â chyrff cyhoeddus.
Gohirio sesiwn galw heibio 12 Rhagfyr
Cynhaliwyd sesiwn galw heibio yng nghanol y ddinas yr wythnos diwethaf ar Rhagfyr 2, lle gallai pobl ddysgu mwy am y cynllun.
Roedd sesiwn galw heibio arall i fod i gael ei chynnal ar 12 Rhagfyr, ond bydd hon nawr yn cael ei gohirio nes bod contractwr yn cael ei benodi a bod mwy o eglurder ynghylch yr amserlen.
