Dathlwyd pennod newydd yn hanes diwydiannol a diwylliannol cyfoethog Trefor yr wythnos diwethaf, gydag agoriad swyddogol Wal a Gardd Gyhoeddus JC Edwards, gofod treftadaeth a chymunedol pwysig ar gyrion Safle Treftadaeth y Byd Traphont Ddŵr a Chamlas Pontcysyllte.
Mae’r ardd newydd yn sefyll ar safle hanesyddol hen Waith Brics a Theils JC Edwards, a oedd ar un adeg yn gyflogwr lleol mawr lle roedd cenedlaethau o bobl o Drefor a’r cyffiniau’n gweithio. Mae’r prosiect yn anrhydeddu’r hanes hwnnw wrth greu gofod cyhoeddus newydd sy’n ddeniadol ac yn hygyrch i drigolion ac ymwelwyr fel ei gilydd.
Cynhaliwyd y seremoni agoriadol ddydd Gwener 12 Rhagfyr 2025 ac roedd y cynghorwyr lleol Sue Kempster a Rondo Roberts yn bresennol, ynghyd â chynghorwyr cymunedol eraill, aelodau o’r gymuned a gwesteion gwadd.
Mae Wal a Gardd Gyhoeddus JC Edwards wedi bob yn bosibl diolch i’r cyllid a sicrhawyd drwy Gronfa Ffyniant Bro Llywodraeth y DU, sydd wedi cefnogi’r gwaith adfywio sensitif yn y lleoliad hanesyddol pwysig hwn, gan wella’r Safle Treftadaeth y Byd ehangach wrth ddarparu cyfleoedd newydd i’r gymuned ei ddefnyddio, myfyrio a mwynhau.
Wrth siarad yn y digwyddiad, tynnodd cynrychiolwyr sylw at bwysigrwydd gwarchod treftadaeth ddiwydiannol Trefor a chydnabod y bobl a fu’n gweithio yng ngwaith JC Edwards, tra’n sicrhau bod yr ardal yn parhau i ffynnu er lles cenedlaethau’r dyfodol.
Helpodd y Cynghorydd cymunedol lleol, Sue Kempster, i gydlynu’r prosiect a dywedodd “Diolch i Gyngor Wrecsam am gynnwys ein prosiect cymunedol pan wnaethon nhw gais am gyllid gan lywodraeth y DU”.
Mae’r ardd newydd yn ychwanegu at y buddsoddiad parhaus yn Safle Treftadaeth y Byd Traphont Ddŵr a Chamlas Pontcysyllte, yn dilyn astudiaeth ddichonoldeb a ariannwyd gan dîm Tirwedd Genedlaethol Bryniau Clwyd, ac mae’n helpu ymhellach i atgyfnerthu ei statws fel lle o arwyddocâd rhyngwladol, balchder lleol, a hanes a rennir.
Mae Wal a Gardd Gyhoeddus JC Edwards bellach ar agor i’r cyhoedd a bydd yn deyrnged barhaol i orffennol diwydiannol Trefor a’i gymuned fywiog.
