Aur i Wrecsam
Mae’n swyddogol, mae Wrecsam wedi ennill gwobr aur yng nghystadleuaeth Cymru yn ei Blodau 2024.
Mae neges y gystadleuaeth, ‘Helpu Cymunedau i Dyfu’, yn annog cefnogaeth gymunedol er mwyn gwella’r amgylchedd lleol.
Dywedodd y Cynghorydd Nigel Williams, Aelod Arweiniol yr Economi ac Adfywio, “Mae’n wych bod ymdrechion y tîm ar draws y sir wedi’u cydnabod am ail flwyddyn yn olynol gyda gwobr aur gan Gymru yn ei Blodau.
“Ar ôl ennill gwobr aur y llynedd, cawsom ein gwahodd i gynrychioli Cymru yng nghystadleuaeth Prydain yn ei Blodau, yn erbyn Llundain a Dundee. Cawn wybod canlyniadau’r gystadleuaeth honno maes o law, ond am rŵan, mae’n wych gweld gwaith caled y staff a’r gwirfoddolwyr yn dwyn ffrwyth.”
Taith y beirniaid
Cafodd y beirniaid daith o Wrecsam i arddangos beth sy’n digwydd ar draws y sir, yn ogystal â Chanol y Ddinas.
Dechreuodd eu taith yng Nghoedpoeth, gyda gardd flaen o fywyd gwyllt naturiol.
Yna aethant ymlaen i Blanhigfa Pentrebychan, lle mae twnelau polythen newydd eu hadnewyddu a rhai newydd wedi’u hadeiladu, gan wella ein gallu i dyfu’n gynaliadwy.
Bu preswylwyr Bradle yn arddangos eu gerddi cymunedol a’u gerddi ffurfiol.
Oddi yno, aeth y beirniaid ymlaen i Ganolfan Ailgylchu FCC i gael sgwrs am gyfraddau ailgylchu a phrosiectau amgylcheddol eraill.
Roedd defnyddwyr a gwirfoddolwyr o brosiect Gardd Furiog Erlas yno i gyfarch y beirniaid a dangos y safle iddynt.
Bu clwb garddio Ysgol Uwchradd Rhosnesni yn dangos eu gwaith yn eu gardd lysiau a’u gardd synhwyraidd wych.
Yn ystod yr ymweliad â Chanol y Ddinas, bu’r beirniaid yn siarad â Phrif Weithredwr Cyngor Wrecsam, Ian Bancroft, yr Arweinydd, y Cynghorydd Mark Pritchard, y Dirprwy Arweinydd, David Bithell, yn ogystal â Maer Wrecsam, y Cynghorydd Beryl Blackmore.
Daeth y daith i ben yn adeilad Tŷ Pawb, lle bu’r beirniaid yn cwrdd â thîm o Gasglwyr Sbwriel Wrecsam, hyfforddeion y Cyngor ac aelodau eraill o’r tîm Amgylcheddol.
Adborth y beirniaid
“Roeddem yn hynod o falch o weld a chlywed am yr amrywiaeth eang o gyfleoedd gwirfoddoli sy’n caniatáu i breswylwyr fod yn rhan weithredol o ofalu am eu mannau gwyrdd lleol.
“Mae ymrwymiad Wrecsam i gyfrifoldeb amgylcheddol wedi’i gofnodi’n glir yn eich portffolio. Da iawn!
“Yn wir, ydyn, mae ystadegau ailgylchu Wrecsam, fel y’i cyflwynir gan FCC Environment, yn wych, roedd yn dda clywed am fathau a niferoedd y digwyddiadau sy’n cael eu trefnu i annog preswylwyr a busnesau yn Wrecsam i ailgylchu ymhellach.
“Roedd yn dda cwrdd â’ch gwirfoddolwyr casglu sbwriel a chlywed faint o sbwriel maen nhw’n ei gasglu’n rheolaidd.
“Rydym wrth ein boddau o ddyfarnu gwobr AUR a Gwobr Categori Dinas Cymru yn ei Blodau 2024 i Wrecsam yn ei Blodau. Llongyfarchiadau lu i chi!”
