Mae llys ynadon Wrecsam wedi cyhoeddi gorchymyn llys (dydd Mercher 29 Tachwedd) i gau siop fanwerthu yn 30 Stryt Fawr yng nghanol dinas Wrecsam am 3 mis hyd at 28 Chwefror 2024.
Gwnaed y cais am y gorchymyn gan Swyddogion Safonau Masnach o Wasanaeth Gwarchod y Cyhoedd y Cyngor yn dilyn hanes o gyflenwi cynnyrch fêpio anghyfreithlon gan “The Vape Shop” oedd wedi bod yn masnachu yn y cyfeiriad. Ym mis Medi 2023, cafodd dros 3,000 o fêps tafladwy anghyfreithlon eu hatafaelu gyda gwerth masnachol o tua £30,000.
Mae swyddogion wedi ymgysylltu â pherchennog y busnes, Mr Akram Kadir, i egluro’r gyfraith a sut i osgoi cynnyrch anghyfreithlon. Er hyn, mae profion prynu fêps yn ddiweddar wedi dangos bod y siop wedi parhau i werthu cynnyrch anghyfreithlon.
Mae fêpio wedi dod yn fwy a mwy poblogaidd yn ystod y deng mlynedd ddiwethaf ac fe’i cydnabyddir yn eang fel ffordd effeithiol o roi’r gorau i ysmygu tybaco. Fodd bynnag, yn fwy diweddar, mae diddordeb mewn fêps tafladwy wedi ffrwydro ac mae pobl sydd erioed wedi ysmygu yn rhoi cynnig arnynt. Mae’n anghyfreithlon gwerthu cynnyrch fêp i rai dan 18 oed, ond er hyn, mae fêps wedi dod yn boblogaidd ymysg pobl ifanc ac mae llawer o’r cynnyrch sydd ar gael yn apelio i blant gyda’u blas melys a phecynnu llachar. Mae rhai cynnyrch anghyfreithlon wedi defnyddio enwau fferins poblogaidd i’w hyrwyddo hyd yn oed.
- Cofrestru -
Er ei fod yn llawer llai niweidiol nag ysmygu tybaco, nid yw defnyddio fêps heb ei risgiau chwaith. Oherwydd hynny, mae’r gyfraith yn gosod cyfyngiadau penodol ar fêps tafladwy gydag uchafswm capasiti ac uchafswm cryfder nicotin. Mae gofynion labelu caeth hefyd. Roedd fêps anghyfreithlon fel y rhai a ddarganfuwyd yn The Vape Shop yn groes i’r cyfyngiadau hyn gan achosi niwed sylweddol posibl i iechyd y bobl oedd yn eu defnyddio.
Dywedodd yr Aelod Arweiniol Gwarchod y Cyhoedd, y Cynghorydd Terry Evans, “Mae’r cynnydd cyflym yn nifer y bobl a phlant sydd erioed wedi ysmygu ond sy’n defnyddio fêps yn peri pryder mawr ac mae’n dda gweld bod Llywodraeth Cymru a Llywodraeth y DU yn ystyried deddfwriaeth newydd i fynd i’r afael â’r broblem.
“Mae gwerthu cynnyrch rhy gryf a rhy fawr yn ein cymuned yn peri pryder penodol ac ni fyddwn yn meddwl ddwywaith cyn defnyddio’r grym cyfreithiol sydd gennym i amddiffyn iechyd a lles ein pobl ifanc. Rwyf yn croesawu canlyniad y gweithredu hwn gyda’r effaith ymarferol iawn o gau’r eiddo am gyfnod hir.
“Mae’r tarfu hwn yn effeithio nid yn unig ar berchennog y busnes ond hefyd ar berchennog yr eiddo na fydd yn gallu defnyddio na rhentu’r eiddo at unrhyw ddiben am y 3 mis nesaf. Os ydych chi’n landlord neu asiant eiddo â thenantiaid sy’n torri’r gyfraith fel hyn, dylech fod yn ymwybodol y gellir cymryd camau tebyg sy’n arwain at fethu â defnyddio’r eiddo drwy orchymyn y Llys.”
Efallai yr hoffech hefyd ddarllen Gwiriwch fod y tacsi yr ydych yn mynd iddo yn gyfreithlon!
Derbyniwch y newyddion diweddaraf ar sgamiau, galw nôl cynnyrch a materion diogelu’r cyhoedd eraill
