Dydd Mawrth nesaf (11 Gorffennaf 2023) bydd y Bwrdd Gweithredol yn pleidleisio ar fuddsoddi £200,000 i wella gwasanaethau bws lleol.
Bydd yr adroddiad yn rhoi’r wybodaeth ddiweddaraf am sefyllfa’r arian pontio gan Lywodraeth Cymru yn ogystal â bwriad y Cyngor i gefnogi’r rhwydwaith bysiau lleol.
Fe ofynnir i Aelodau sicrhau fod yr arian yn cael ei ddefnyddio i adeiladu ar y rhwydwaith bysiau presennol a buddsoddi mewn gwasanaethau cynyddol gyda’r nos ac ar benwythnosau, a all agor y gwasanaeth bws lleol i ddefnyddwyr newydd.
Hefyd mae cynlluniau i ymgysylltu gyda budd-ddeiliaid allweddol er mwyn deall y rhwystrau y mae pobl yn eu hwynebu o ran defnyddio cludiant cyhoeddus.
“Mae’r rhwydwaith bysiau wedi dioddef dros y blynyddoedd diwethaf”
Dywedodd y Cynghorydd David A Bithell, Aelod Arweiniol Tai sydd â Chyfrifoldeb dros Gludiant Strategol fod gweinyddiaeth y Cyngor wedi cefnogi buddsoddiad o £200,000 eleni yn y rhwydwaith bysiau lleol.
Ychwanegodd y Cynghorydd Bithell, “Mae’r rhwydwaith bysiau wedi dioddef dros y blynyddoedd diwethaf gyda thoriadau parhaus i wasanaethau. Rydym wedi bod yn gweithio gyda Llywodraeth Cymru a’r diwydiant bysiau i adolygu a gwella’r rhwydwaith yn arbennig yn dilyn y pandemig. Mae’n bwysig o ystyried ein hymgyrch ar ddatgarboneiddio wrth i ni edrych ar ddulliau eraill o ran cludiant sy’n wahanol i’r car ac i wneud hyn mae angen i ni weld gwelliant o ran cludiant cyhoeddus.
“Mae’r cyllid hwn ym mlwyddyn un yn cefnogi llwybrau presennol drwy ehangu gwasanaethau gyda’r nos ac ar benwythnosau yn ddibynnol ar gaffael. Bydd hyn hefyd yn cefnogi’r economi leol ac yn cefnogi canol ein dinas ac yn annog pobl i edrych ar ddulliau eraill o ran teithio. Rydym hefyd yn lobïo gweithredwyr bysiau a Llywodraeth Cymru yn frwd i leihau eu prisiau ac annog mwy o ddefnydd o fewn y diwydiant bysiau.
“Yn ddibynnol ar gymeradwyaeth y bwrdd gweithredol fe fyddwn yn edrych ar gyflwyno ac ehangu’r rhwydwaith yn gynnar yn yr hydref.”
