Gallai cynlluniau i ymgynghori ar ddyfodol tair ysgol gynradd ym Mwrdeistref Sirol Wrecsam gael sêl bendith yn ddiweddarach y mis hwn.
Ddydd Mawrth, 16 Medi, bydd Bwrdd Gweithredol Cyngor Wrecsam yn edrych ar gynigion i ymgynghori ar ddyfodol Ffederasiwn Ysgolion Dyffryn Dyfrdwy, sy’n cynnwys ysgolion cynradd yn Froncysyllte, Garth a Pentre.
Os bydd y bwrdd yn rhoi sêl bendith, bydd gofyn i aelodau’r cyhoedd – gan gynnwys rhieni a gofalwyr – rannu eu barn ar gynigion i gau’r ysgol yn Froncysyllte, tra bydd yr ysgolion yn Garth a Pentre yn cael eu cadw.
Dros y pum mlynedd diwethaf, mae’r tair ysgol wedi disgyn ymhell o dan y nifer o ddisgyblion maent yn gallu derbyn, gyda Froncysyllte yn cofnodi’r ffigyrau isaf gyda dim ond 11 o ddisgyblion wedi’u cofrestru yn ystod y flwyddyn academaidd ddiwethaf.
Pe bai penderfyniad yn cael ei wneud i gau’r ysgol yn Froncysyllte, byddai disgyblion yn cael cynnig lle mewn ysgol amgen.
Dywedodd y Cynghorydd Phil Wynn, yr Aelod Arweiniol dros Addysg: “Am y pum mlynedd diwethaf, mae nifer y disgyblion ym mhob un o’r tair ysgol wedi gostwng, llawer is na’r cynifer o ddisgyblion maent yn gallu eu derbyn.
“Gyda niferoedd mor isel a chymaint o leoedd gwag, mae’n gwneud synnwyr adolygu strwythur Ffederasiwn Dyffryn Dyfrdwy ac ystyried a yw cadw’r tair ysgol yn gynaliadwy.
“Fel cyngor, mae’n rhaid i ni wneud yn siŵr bod ysgolion yn hyfyw yn hirdymor, ond rydym hefyd yn sensitif i anghenion a dewisiadau rhieni a gofalwyr – felly os bydd yr ymgynghoriad yn cael sêl bendith, byddwn yn annog pobl i gymryd rhan fel y gallwn gael eu barn cyn penderfynu sut i symud ymlaen.”
Os bydd y Bwrdd Gweithredol yn rhoi sêl bendith, bydd yr ymgynghoriad yn cael ei lansio ar 23 Medi a bydd ar agor tan 7 Tachwedd.
