Y Nadolig hwn bydd Wrecsam yn cynnal ei Wasanaeth Carolau Cymuned y Lluoedd Arfog cyntaf erioed.
Bydd y digwyddiad rhad ac am ddim yn cael ei gynnal yn Eglwys San Silyn nos Fawrth, 5 Rhagfyr, gan ddechrau am 7pm. Mae croeso i bawb.
Dywedodd y Cynghorydd Beverley Parry-Jones, Cefnogwr y Lluoedd Arfog Wrecsam: “Mae yna gysylltiadau mor gryf gyda’r lluoedd arfog yn Wrecsam, ac rydym eisiau gwneud rhywbeth arbennig i ddathlu’r Nadolig a rhoi teyrnged i gyn-filwyr a’r dynion a merched anhygoel sydd yn gwasanaethu eu gwlad.
“Mae’n argoeli i fod yn noson hyfryd yn llawn ysbryd a cherddoriaeth y Nadolig, ac fe fyddem ni wrth ein bodd yn gweld cymaint o gyn-filwyr ac aelodau o’r cyhoedd yno ag sy’n bosibl.
- Cofrestru -
“Dewch draw i helpu i’w gwneud hi’n noson wych.”
Fe fydd y gwasanaeth yn cynnwys Band Tywysog Cymru, sef un o’r 14 band rheolaidd ym Myddin Prydain.
Wedi’u lleoli yn Aberhonddu, mae’r cerddorion wedi teithio llawer ar ôl gwasanaethu yn Yr Almaen, Cyprus, Dubai, Kuwait ac Ynysoedd Falkland ac yn rownd derfynol Cwpan FA Lloegr yn stadiwm Wembley.
Bydd côr lleol hefyd yn perfformio, a bydd rhoddion yn mynd i elusen Scotty’s Little Soldiers.
Dywedodd y Cynghorydd Parry-Jones: “Yr ysbrydoliaeth y tu ôl i elusen Scotty’s Little Soldiers oedd profiad gweddw Nikki Scott, a gollodd ei gŵr yn Affganistan yn 2009.
“Mae’n darparu cefnogaeth i gannoedd o blant a phobl ifanc ar draws y DU sydd wedi colli rhiant sydd wedi gwasanaethu yn y Lluoedd Arfog Prydeinig ar ryw adeg yn eu bywyd, ac mae’n gwneud gwaith anhygoel.
“Rydym ni mor falch o gefnogi’r elusen hon a gobeithio y bydd pobl Wrecsam yn dangos eu cefnogaeth ar 5 Rhagfyr drwy ddod draw i’r gwasanaeth carolau yn San Silyn.
“Mae hi’n mynd i fod yn noson hyfryd ac rydym ni’n edrych ymlaen at groesawu pawb.”
