Mae gwirio pa ddiwrnod y cesglir eich biniau yn ffordd wych i wybod pa bryd fydd eich casgliadau ailgylchu dros y Nadolig.
Mae yna newidiadau i ddyddiau casglu arferol rhai aelwydydd dros gyfnod yr Ŵyl, ac mae hyn yn ffordd dda o wneud yn siŵr eich bod yn gwybod pryd i chi roi’ch biniau allan.
Gallwch wirio eich diwrnod biniau yma. Ni fydd angen i chi fewngofnodi i wirio eich diwrnod biniau, a gallwch wirio ar ran ffrindiau, teulu a chymdogion trwy deipio eu cod post neu enw eu stryd.
Rydym yn eich cynghori’n gryf i wneud hyn dros gyfnod y Nadolig, pan fo newidiadau i’r patrymau casglu arferol yn debygol.
Ffordd arall o gael y wybodaeth ddiweddaraf ynglŷn â chasglu biniau yw cofrestru i dderbyn e-byst atgoffa. Os gwnewch chi hyn, fe gewch chi neges e-bost i’ch atgoffa i roi’ch biniau allan y diwrnod cyn y diwrnod casglu. Mae’n ffordd dda i ni adael i chi wybod ynglŷn ag unrhyw newidiadau sy’n effeithio arnoch chi hefyd.
Pethau i’w nodi
- Yn ystod yr wythnos sy’n dechrau ar 16 Rhagfyr, bydd pob cartref yn Wrecsam yn derbyn casgliad ailgylchu, gwastraff bwyd a gwastraff cyffredinol (bin du/glas).
- Yn ystod yr wythnos sy’n dechrau ar 23 Rhagfyr, ni fydd unrhyw gartref yn Wrecsam yn cael casgliad gwastraff cyffredinol (bin du/glas) na chasgliad gwastraff gardd (bin gwyrdd) – dim ond casglu deunyddiau ailgylchu a gwastraff bwyd y byddwn ni ddydd Llun a dydd Mawrth (noswyl Nadolig).
- Ni fydd unrhyw gasgliad rhwng 25 Rhagfyr a 27 Rhagfyr. Bydd preswylwyr sydd wedi cael eu heffeithio yn cael gadael gwastraff ychwanegol i’w ailgylchu yr wythnos wedyn, fel y nodir isod.
- Yn ystod yr wythnos sy’n dechrau ar 30 Rhagfyr, bydd pob cartref yn Wrecsam yn derbyn casgliad ailgylchu, gwastraff bwyd a gwastraff cyffredinol (bin du/glas).
- Ni fydd unrhyw gasgliad ddydd Mercher, 1 Ionawr, felly os yw eich diwrnod casglu bin gwastraff ar ddydd Mercher, dydd Iau neu ddydd Gwener, bydd eich diwrnod casglu ddiwrnod yn hwyrach nag arfer (gallwch wirio eich diwrnod casglu bin ar gyfer y dyddiadau diwygiedig).
Ailgylchu ychwanegol
Os bydd eich bocsys ailgylchu yn llenwi, fe allwch chi adael unrhyw deunyddiau ychwanegol i’w hailgylchu mewn cynhwysydd solet wrth ymyl eich gwastraff ailgylchu ar eich diwrnod casglu, ac fe awn ni â’r rheiny i’w hailgylchu hefyd (gan adael y cynhwysydd i chi ei ddefnyddio eto).
Ond os oes gennych chi ddeunyddiau ychwanegol i’w hailgylchu, cofiwch eu gwahanu fel y byddech chi’n ei wneud fel arfer. Er enghraifft, os oes gennych chi boteli gwydr a phlastig yn ychwanegol, rhowch y rhai plastig mewn un cynhwysydd a’r rhai gwydr mewn cynhwysydd ar wahân.
Hefyd, fe wnawn ni gasglu cardfwrdd glân wedi’i blygu’n fflat ac wedi’i adael wrth ymyl y cynhwysydd, cyn belled ag nad ydi o’n dalach na’n lletach na sach glas safonol.
