Mae siop gyfleustra yng nghanol y ddinas wedi cael gorchymyn i gau am dri mis yn dilyn camau gweithredu gan wasanaeth Diogelu’r Cyhoedd Cyngor Wrecsam gyda chymorth Heddlu Gogledd Cymru.
Cafodd y gorchymyn i gau, a roddwyd gan Lys Ynadon Wrecsam, ei wneud yn erbyn Easy Shop yn 24 King Street, Wrecsam.
Fe’i dyfarnwyd yn dilyn cais i’r llys gan swyddogion Safonau Masnach a nododd achosion lu o werthu ac atafael sigaréts anghyfreithlon dros y misoedd diwethaf.
Mae’r gorchymyn yn golygu bod y safle wedi’i gau a’i gloi a bydd yn aros felly tan 11 Mai 2025.
Daw hyn yn dilyn camau gweithredu tebyg gan y Cyngor pan gaewyd Kalar Mini Market yn Rhiwabon am 3 mis ddiwedd mis Ionawr.
Dywedodd Roger Mapleson, yr Arweinydd Safonau Masnach a Thrwyddedu, “Mae’r cynnydd cyflym yn nefnydd fêps gan bobl nad ydynt erioed wedi ysmygu a’u defnydd gan blant yn peri pryder mawr ac mae’n dda gweld bod Llywodraeth y DU a Llywodraeth Cymru yn symud ymlaen tuag at ddeddfwriaeth newydd yn ddiweddarach eleni a fydd yn helpu i reoli’r cyflenwad o fêps a thybaco anghyfreithlon a chefnogi cynnydd tuag at amcan Llywodraeth Cymru o gael Cymru ddi-fwg erbyn 2030.”
“Mae gwerthu cynhyrchion anghyfreithlon yn ein cymuned yn peri pryder arbennig ac ni fyddwn yn oedi cyn defnyddio’r pwerau cyfreithiol sydd gennym i ddiogelu iechyd a lles ein pobl ifanc. Mae sigaréts a thybaco rholio rhad sydd ar gael yn hawdd yn ei gwneud hi’n haws i blant ddod yn gaeth i gynnyrch marwol hyd eu hoes ac yn anoddach i ysmygwyr sy’n oedolion roi’r gorau iddi. Mae fêps tafladwy rhad hefyd yn peri risg i iechyd plant nad ydynt yn ysmygu ac mae’r nifer fawr ohonynt sy’n cael eu taflu yn achosi problemau amgylcheddol mawr ac wedi achosi nifer o danau yn y diwydiant gwastraff.
“Rwy’n croesawu canlyniad y gweithredu hwn gyda’r effaith ymarferol iawn o gau’r safle am gyfnod sylweddol o amser.
“Mae’r tarfu hwn nid yn unig yn effeithio ar berchennog y busnes ond hefyd ar berchennog yr eiddo na fydd yn gallu defnyddio na rhentu’r safle at unrhyw ddiben am y tri mis nesaf. Byddwn yn parhau i gymryd y camau cyfreithiol effeithiol iawn hyn i gosbi’r fasnach anghyfreithlon hon, a tharfu arni.
“Os ydych yn landlord neu’n asiant eiddo gyda thenantiaid sy’n torri’r gyfraith fel hyn, byddwch yn ymwybodol y gellir cymryd camau tebyg gan arwain at golli defnydd o’r safle drwy orchymyn y Llys.”
