Mae Cyngor Bwrdeistref Sirol Wrecsam yn croesawu dyfarniad y llys heddiw yn dilyn problemau niwsans sŵn difrifol a hirdymor yn ymwneud â chŵn yn cyfarth yn ddi-baid ac aflonyddwch cysylltiedig yn Rhodfa’r Celyn, Wrecsam.
Ers mis Rhagfyr 2022, mae’r Cyngor wedi derbyn cwynion niferus gan gartrefi cyfagos ynghylch chyfarth di-baid gan sawl ci sy’n cael eu cadw yn yr eiddo. Dros y cyfnod hwn, cynhaliwyd pedwar ymarfer monitro sŵn ar wahân, gan gofnodi cyfanswm o 965 o achosion o gyfarth, gyda llawer ohonynt yn digwydd yn hwyr yn y nos ac yn achosi trallod sylweddol a pharhaus i drigolion cyfagos.
Er gwaethaf cyflwyno Hysbysiad Atal Statudol ac erlyniad llwyddiannus ym mis Tachwedd 2024, parhaodd y niwsans heb osteg. Cadarnhaodd recordiadau sŵn a gwaith monitro pellach ar ddechrau 2025 fod y tramgwyddo yn parhau, gan adael trigolion yn agored i fraw ac aflonyddwch hirfaith.
Yn Llys Ynadon Wrecsam heddiw, plediodd y diffynnydd yn euog i naw trosedd yn ymwneud â thorri Hysbysiad Diogelu’r Gymuned. Gosododd y llys:
- Dirwy o £2,250
- Costau llys o £4,046
- Gorchymyn Ymddygiad Troseddol yn para dwy flynedd
Mae’r Gorchymyn Ymddygiad Troseddol yn gwahardd y diffynnydd neu berson/personau eraill rhag:
- Cadw cŵn yn yr eiddo ar Rodfa’r Celyn, Wrecsam ar unrhyw adeg
- Achosi unrhyw niwsans sŵn yn Rhodfa’r Celyn, Wrecsam ar unrhyw adeg
Mae’r Gorchymyn hefyd yn ei gwneud yn ofynnol i’r diffynnydd:
- Ildio’r holl gŵn sydd ar y safle ar hyn o bryd ac yn y dyfodol i Gyngor Bwrdeistref Sirol Wrecsam, i’w hailgartrefu’n ddiogel.
Dywedodd yr Aelod Arweiniol dros Gynllunio Strategol a Diogelu’r Cyhoedd, y Cynghorydd Hugh Jones, “Mae’r canlyniad hwn yn adlewyrchu difrifoldeb yr effaith hirfaith ar y gymuned ac ymrwymiad y Cyngor i amddiffyn hawl trigolion i fwynhau eu cartrefi mewn hedd. “Byddwn ni’n parhau i fonitro cydymffurfiaeth â’r Gorchymyn Ymddygiad Troseddol ac yn cymryd camau pellach os oes angen.”
