Mae Cyngor Wrecsam yn adolygu cynigion ar gyfer Canolfan Adnoddau Acton ar ôl gwrando ar adborth gan breswylwyr, cynghorwyr a grwpiau cymunedol.
Mae’r cyngor wedi bod yn casglu adborth ar gynlluniau i adleoli ei wasanaeth gofal dydd i bobl ag anghenion cymhleth o Ganolfan Cunliffe yn Rhos-ddu i Ganolfan Adnoddau Acton.
Fodd bynnag, mae’r cyngor yn caniatáu i ymgysylltu pellach ac opsiynau gael eu harchwilio – mae hyn yn cynnwys y potensial i ymestyn yr adeilad fel y gellir ei ddefnyddio ar gyfer gwasanaethau dydd a gan grwpiau cymunedol.
Dywedodd y Cynghorydd Mark Pritchard, Arweinydd y Cyngor: “Mae dod o hyd i leoliad newydd ac addas ar gyfer ein gwasanaeth dydd yn parhau i fod yn flaenoriaeth. Mae Canolfan Cunliffe wedi gweld dyddiau gwell ac mae angen gwell cyfleuster arnon ni i gefnogi pobl ag anghenion cymhleth.
Bydd cyfnod pellach o ymgysylltu nawr yn digwydd gyda chynghorwyr lleol, grwpiau cymunedol sy’n defnyddio Canolfan Adnoddau Acton, a theuluoedd sy’n dibynnu ar y gwasanaeth dydd a ddarperir gan ofal cymdeithasol.
Ychwanegodd y Cynghorydd Pritchard: “Un o’r posibiliadau rydyn ni am ei archwilio yw’r opsiwn i ymestyn yr adeilad i greu mwy o le – gan sicrhau bod y cyfleuster ar gael i’w ddefnyddio gan y gymuned ochr yn ochr â’r gwasanaeth dydd.
“Byddai ymestyn yr adeilad yn amlwg yn costio arian, ond byddwn ni’n gweithio’n ddiflino i ddod o hyd i’r cyllid hwnnw os yw’r syniad yn ymarferol.”
Bydd manylion ynghylch pryd a sut y gall pobl leol, grwpiau, cynghorwyr a defnyddwyr gwasanaeth rannu mwy o adborth yn cael eu cyhoeddi cyn bo hir.
Yn y cyfamser, mae grwpiau sy’n defnyddio’r ganolfan adnoddau wedi cael gwybod bod unrhyw gyfnodau rhybudd blaenorol wedi’u hymestyn o ddau fis, gan ganiatáu iddyn nhw barhau i ddefnyddio’r safle tan o leiaf Awst 1 (2026).
Dywedodd y Cynghorydd Pritchard: “Hoffwn ddiolch i bawb sydd wedi rhoi adborth hyd yma – mae eu barn nhw’n bwysig ac fel cyngor rydyn ni’n gwrando a does dim ofn arnon ni i ailedrych ar bethau.
“Rydyn ni eisiau datrysiad sy’n gallu diwallu anghenion defnyddwyr Canolfan Adnoddau Acton a darparu gwasanaethau dydd modern i oedolion – gan greu dyfodol hirdymor cynaliadwy i’r ased cymunedol hwn.”
