Mae’r rhan fwyaf o ddefnyddwyr y ffordd a gyrwyr wedi teithio ar hyd ffordd a dod ar draws ceffyl a marchog neu grŵp o farchogion yn sydyn.
Ac yn aml gallant fod yn wynebu penbleth uniongyrchol ynglŷn â beth i’w wneud orau yn y sefyllfaoedd hynny i gadw pawb yn y sefyllfa honno’n ddiogel.
Adroddodd Cymdeithas Ceffylau Prydain (CCP) a Diogelwch Ffyrdd Cymru 147 o ddigwyddiadau ar y ffordd yn ymwneud â cheffylau yng Nghymru yn ystod 2025. Hefyd, cofnodwyd yn y DU yn ehangach 2,810 o ddigwyddiadau a 59 o farwolaethau ceffylau yn yr un flwyddyn.
Gyda CCP yn amcangyfrif mai dim ond 1 o bob 10 digwyddiad ar y ffordd sy’n ymwneud â cheffylau sy’n cael ei gofnodi’n swyddogol, tybir bod amlder gwirioneddol y cyfarfyddiadau traffig hyn yn sylweddol uwch.
Felly, beth all gyrwyr ei wneud i sicrhau diogelwch holl ddefnyddwyr y ffordd pan fyddant yn dod ar draws marchog(ion) wrth deithio?
Mae’r rhestr o reolau yn fwy nag ydych yn meddwl efallai…
Mae Rheolau 147, 163 a 167 o Reolau’r Ffordd Fawr yn cynnwys y wybodaeth fwyaf cywir a chyfredol lle gall defnyddwyr y ffordd loywi eu gwybodaeth orau am yr hyn sydd orau i’w wneud mewn achosion o’r fath.
Dywedodd y Cynghorydd David A Bithell, yr Aelod Arweiniol dros yr Amgylchedd: – “Mae diogelwch holl ddefnyddwyr y ffordd bob amser yn flaenoriaeth o dan unrhyw amgylchiadau, ond yn enwedig wrth sicrhau diogelwch ceffylau a’u marchogion.
“Mae’n amlwg bod ceffylau yn gallu bod yn anifeiliaid anrhagweladwy ar y gorau, yn enwedig pan fyddant yn wynebu cerbydau cyflym neu ddiofal, ac mae hynny’n gallu achosi canlyniadau trychinebus i bawb sy’n rhan o’r sefyllfa.
“Felly byddwn yn annog unrhyw un i edrych ar y rheolau cysylltiedig yn Rheolau’r Ffordd Fawr, i loywi eu gwybodaeth neu addysgu eu hunain ar y canllawiau ynghylch defnydd diogel ar y ffyrdd rhag ofn y byddant yn dod ar draws marchogion wrth deithio.
“Gadewch i ni wneud popeth y gallwn i gael yr ystadegau hyn i lawr a gwneud ein ffyrdd mor ddiogel ag y gallant fod i bawb.”
