Mae buddsoddiad parhaus mewn trafnidiaeth gyhoeddus leol bellach wedi cefnogi mwy na 220,000 o deithiau ar draws Wrecsam, wrth i’r defnydd o nifer o wasanaethau bws a ariennir gan y Cyngor barhau i dyfu.
Ers 2023, mae Cyngor Wrecsam wedi cymeradwyo £650,000 o gyllid i gefnogi gwasanaethau bws lleol ychwanegol, gan helpu i gyflwyno llwybrau newydd, ymestyn gwasanaethau gyda’r nos a chynnig teithiau ychwanegol ar y penwythnos.
Mae’r ffigurau diweddaraf, a gofnodwyd ddiwedd mis Awst 2026, yn dangos bod y gwasanaethau a gefnogir drwy’r buddsoddiad hwn bellach wedi sicrhau 220,575 o deithiau i deithwyr.
Mae nifer y teithwyr wedi cynyddu’n sylweddol, gan godi o 57,149 o deithiau yn 2024/25 i 91,797 yn 2025/25 – cynnydd o tua 61%.
Mae’r defnydd wedi parhau yn ystod y flwyddyn gyfredol, gyda 56,754 o deithiau wedi’u cofnodi rhwng mis Ebrill a diwedd mis Awst 2026.
Twf ar draws gwasanaethau lleol
Mae’r cynnydd cyffredinol yn cael ei adlewyrchu ar draws amrywiaeth o wasanaethau a gefnogir gan y Cyngor, gan gynnwys gwasanaethau gyda’r nos, ar y penwythnos ac ar lwybrau newydd.
Mae’r gwasanaeth gyda’r nos rhwng Wrecsam a’r Mwynglawdd wedi gweld twf arbennig o dda, tra bod gwasanaethau ar ddydd Sul ac ar Wyliau Banc sy’n gwasanaethu ardaloedd gan gynnwys Borras, Lôn Barcas, Pen-y-cae a Pharc Caia yn parhau i gynnig cysylltiadau pwysig i gymunedau y tu allan i oriau gweithredu arferol yn ystod yr wythnos.
Mae gwasanaethau mwy newydd hefyd yn denu teithwyr. Mae’r gwasanaeth o Wrecsam i Johnstown yn ystod y dydd, ynghyd â’r gwasanaeth bob awr sy’n gwasanaethu Moss a Lodge, ill dau wedi cael eu defnyddio’n barhaus ers iddyn nhw gael eu cyflwyno.
Mae’r ffigurau’n dangos nad yw’r galw wedi’i gyfyngu i un math penodol o daith, gyda theithwyr yn defnyddio gwasanaethau trwy gydol y dydd yn ogystal â gyda’r nos ac ar y penwythnos.
Dywedodd y Cynghorydd David A Bithell, yr Aelod Arweiniol dros yr Amgylchedd, “Rydyn ni wedi parhau i fuddsoddi mewn gwasanaethau bws lleol oherwydd ein bod ni’n gwybod pa mor bwysig yw cysylltiadau trafnidiaeth gyhoeddus da i gymunedau ledled Wrecsam.
Mae’n galonogol iawn gweld nifer y teithwyr yn parhau i dyfu a mwy na 220,000 o deithiau wedi cael eu cefnogi trwy’r buddsoddiad hwn erbyn hyn.
Mae’r gwasanaethau hyn yn cynnwys teithiau gyda’r nos, ar ddydd Sul ac ar Wyliau Banc, yn ogystal â chysylltiadau newydd a gwell i gymunedau ledled y fwrdeistref sirol.
Mae mwy y gallwn ni ei wneud bob amser, a byddwn ni’n parhau i weithio gyda gweithredwyr a’n partneriaid i wella’r rhwydwaith bysus lleol a gwneud trafnidiaeth gyhoeddus yn opsiwn ymarferol i’n pobl.”
Adeiladu ar y buddsoddiad
Gyda nifer y teithwyr yn parhau i dyfu, bydd Cyngor Wrecsam yn parhau i weithio gyda gweithredwyr a phartneriaid i adeiladu ar y buddsoddiad sydd eisoes wedi’i wneud ac edrych ar ragor o gyfleoedd i wella gwasanaethau bws a chyfleusterau i deithwyr ledled Wrecsam.
