Dim ond ychydig ddyddiau sydd ar ôl cyn gêm gyntaf y tymor pêl-droed ar y Cae Ras, felly gwnewch yn siŵr eich bod wedi cynllunio eich taith.
Gall lleoedd parcio canol y ddinas lenwi’n eithaf cyflym ar ddiwrnodau gêm, ond mae yna ddigon o opsiynau fforddiadwy eraill i’ch cael i’r gêm.
Parcio a theithio
Parcio am ddim a dim ond £1 am docyn dwyffordd i’r stadiwm (50c i blant, ac am ddim os oes gennych bàs teithio consesiynol ar gyfer y rheini dros 60 oed) a chyda 143 o fannau parcio, mae digon o le.
Mae Arriva Gogledd-orllewin Lloegr a Chymru’n rhedeg pum bws cyn ac ar ôl y gêm, yn rhedeg bob 20 munud i Ffordd yr Wyddgrug, yn union y tu allan i’r cae.
Cymerwch gip ar y fideo isod i gael rhagor o wybodaeth am sut mae’n gweithio.
Bysus Arriva ym Mharth Wrecsam
Os ydych chi’n prynu tocyn diwrnod ar gyfer oedolyn i gyrraedd y gêm, bydd yn costio £2 yn unig pan fyddwch chi’n dangos eich tocyn gêm – mae hynny’n arbed £3.60!
Nid oes angen poeni am gael lle parcio a gallwch hyd yn oed alw heibio i ganol y ddinas am ddiod neu bryd o fwyd wedyn heb orfod meddwl am ba mor hir sydd gennych ar ôl ar eich tocyn parcio.
Dywedodd y Cynghorydd David A Bithell, yr Aelod Arweiniol dros yr Amgylchedd: “Mae cynnydd parhaus yn nifer y cefnogwyr sy’n mynychu gemau cartref wedi rhoi pwysau ychwanegol ar barcio a’r rhwydwaith ffyrdd cyfagos ar ddiwrnodau gêm.
“Mae’r opsiynau teithio fforddiadwy hyn yn rhoi dewis arall cyfleus i gefnogwyr i yrru’n uniongyrchol i’r stadiwm, wrth hefyd helpu i leihau tagfeydd a pharcio diystyriol mewn ardaloedd preswyl cyfagos.
“Mae’r tocyn diwrnod Arriva £2 newydd yn ychwanegiad i’w groesawu y tymor hwn, ochr yn ochr â’n gwasanaeth parcio a theithio poblogaidd ar Ffordd Rhuthun. Rydym yn gobeithio y bydd cefnogwyr yn manteisio ar y cynigion hyn ac yn ein helpu i wneud diwrnodau gêm yn fwy diogel ac yn fwy pleserus i gefnogwyr a thrigolion fel ei gilydd.”
